قازاقستاننىڭ باس تراۆماتولوگى, بەلگىلى عالىم, مەديتسينا عىلىمدارىنىڭ دوكتورى نۇرلان باتپەنوۆتىڭ ەسىمى دەنساۋلىق ساقتاۋ سالاسىنا كەڭىنەن تانىس. وسى اپتادا ەلورداداعى ءوزى باسشىلىق ەتكەن ۇلتتىق عىلىمي تراۆماتولوگيا جانە ورتوپەديا ورتالىعى عيماراتىنىڭ الدىندا پروفەسسورعا ارنالعان سكۆەر مەن ونىڭ ءبيۋستى اشىلدى.
پاندەميا كەزىندە كوز جۇمعان بەلگىلى دارىگەردىڭ ەسىمى بيىل ءوزى باسقارعان ورتالىققا بەرىلگەن ەدى. ەندى, مىنە, ونىڭ ءبيۋستىن اشۋ راسىمىنە دەنساۋلىق ساقتاۋ ءمينيسترى اجار عينيات, استانا قالاسى اكىمىنىڭ ورىنباسارى نۇرلان نۇركەنوۆ, بارلىق دەنساۋلىق ساقتاۋ سالاسىنىڭ بەلدى وكىلدەرى مەن تراۆماتولوگتىڭ تۋىستارى كەلدى.
– عالىمنىڭ ءومىر جولى – كەيىنگى ۇرپاققا, مەديتسينا زەرتتەۋشىلەرىنە ۇلگى-ونەگە. تاۋەلسىزدىك جىلدارىندا ن.باتپەنوۆتىڭ ارقاسىندا العاش اشىلعان ورتالىق مەديتسينا عىلىمىندا ەرەكشە ورىن الادى. سونىڭ كۇشىمەن از ۋاقىتتىڭ ىشىندە تەك رەسپۋبليكا بويىنشا عانا ەمەس, دۇنيە جۇزىندە ەڭ ۇزدىك تانىمال ورتالىققا اينالدى. ونىڭ تىكەلەي باسشىلىعىمەن اۋىلداردا, شالعاي ەلدى مەكەندەردە تراۆماتولوگيا بولىمشەلەرى اشىلدى. كوپتەگەن شاكىرت دايىندادى. قازىر گەرمانيادا باتپەنوۆتىڭ ۇرشىق پروتەزدەرىنىڭ مودەلىن شىعارۋ ءىسى جولعا قويىلعان. ونىڭ وسىنداي باستاعان ىستەرى جالعاسىن تابارىنا سەنىمدىمىن, – دەدى سالتاناتتى راسىمدە ءسوز سويلەگەن دەنساۋلىق ساقتاۋ ءمينيسترى اجار عينيات.
اكىمدىكتىڭ قولداۋىمەن ورتالىق عيماراتىنىڭ الدىنان جالپى اۋدانى جارتى گەكتاردى قۇرايتىن سكۆەر سالىنىپ, وندا شىرشا, قاراعاي, قايىڭ سياقتى اعاش وتىرعىزىلدى.
– COVID-19 ىندەتىمەن كۇرەس كەزىندە ەلدىڭ دەنساۋلىعىن ساقتايمىن دەپ ءجۇرىپ, ءوزى ومىردەن وتكەن نۇرلان جۇماعۇلۇلى – دەنساۋلىق ساقتاۋ سالاسىنىڭ, مەديتسينا عىلىمىنىڭ, ەلوردانىڭ دامۋىنا ۇلكەن ۇلەس قوسقان ازامات. كوپتەگەن وتا جاساپ, مىڭداعان ادامنىڭ ءومىرىن ساقتاپ قالعان ابزال جان. 2001 جىلى ۇكىمەتتىڭ قاۋلىسىمەن اشىلعان تراۆماتولوگيا جانە ورتوپەديا عىلىمي-زەرتتەۋ ينستيتۋتىنىڭ تۇڭعىش باسشىسى بولىپ, ونى ءومىرىنىڭ سوڭىنا دەيىن 19 جىل باسقاردى. وسى ينستيتۋتتىڭ ماقتانىشى – ن.باتپەنوۆتىڭ Implant Cast نەمىس كومپانياسىمەن بىرلەسە جاساپ شىعارعان بۋىن شەمىرشەگىن حيرۋرگيالىق قالپىنا كەلتىرۋدىڭ بىرەگەي ادىستەمەسى, – دەدى قالا اكىمىنىڭ ورىنباسارى ن.نۇركەنوۆ.
اقمولا وبلىسى ساندىقتاۋ اۋدانىندا دۇنيەگە كەلىپ, تسەلينوگراد مەديتسينا ينستيتۋتىندا جوعارى ءبىلىم العان ن.باتپەنوۆ ەڭبەك جولىن تسەلينوگراد قالاسىنداعى وبلىستىق كلينيكالىق اۋرۋحانانىڭ تراۆماتولوگيا جانە ورتوپەديا بولىمشەسىندە دارىگەر بولىپ باستاعان. قر ۇعا اكادەميگى ن.جۇماعۇلۇلىنىڭ باسشىلىعىمەن 6 دوكتورلىق جانە 20 كانديداتتىق ديسسەرتاتسيا قورعالعان.
