ەلوردادا «استانا-2019» ءححى حالىقارالىق اۆتورلىق اندەر فەستيۆالى ءوتتى. ءۇش كۇنگە سوزىلعان مۋزىكا مەرەكەسىنە ادەتتەگىدەي ەل اۋماعىنان جانە تمد مەملەكەتتەرىنەن باردتار جينالدى.
فەستيۆالدىڭ قۇرمەتتى قوناقتارى قاتارىنان ماسكەۋدە تۇراتىن قانداسىمىز جەڭىس ىسقاقوۆ, ولگا كاچانوۆا مەن ۆاديم كوزلوۆ (الماتى), رومان لانكين (تومسك), رايسا ابەلسكايا (ەكاتەرينبۋرگ) سىندى باردتىق ورتاعا بەلگىلى ونەرپازدار ورىن الدى. ءىس-شارا باعدارلاماسىنا العاشقى رەت 16 جاسقا دەيىنگى جاسوسپىرىمدەر اراسىندا بايقاۋ قوسىلدى. ولار «اۆتور», «ورىنداۋشى» جانە «انسامبل» اتالىمدارى بويىنشا جارىستى. وسى اتالىمدارعا قاتىسۋدىڭ باستى شارتى گيتارادا ويناي ءبىلۋ بولدى.
جەڭىس ىسقاقوۆ اتالمىش فەستيۆالگە جىلدا قاتىسادى. قاراعاندى مۋزىكالىق ۋچيليششەسىنەن تۇلەپ ۇشقان ونىڭ رەسەيدە اجەپتاۋىر تانىمالدىعى بار. جەڭىستى وسىنداي فەستيۆالدەردىڭ قازىلار القاسىنا ۇنەمى شاقىرىپ تۇرادى. ول ءوزىنىڭ اۆتورلىق اندەرىمەن قاتار ەۋروپا كلاسسيكاسىن ورىندايدى. قازاق اندەرىنىڭ باسىن قوسىپ, بىرنەشە ديسك تە شىعارعان. وسى جولى دا بارد كورەرمەندەردى شىعارماشىلىعىنداعى ۇزدىك تۋىندىلارمەن ءتانتى ەتتى.
ءىس-شارا وتكەن اۋماقتا جىلداعىداي بىرنەشە شاتىر تىگىلىپ, قاتىسۋشىلار ەمىن-ەركىن سىرلاسىپ, شەبەرلىك الماستى. ساحنادان دا, كەشكىلىك ۋاقىتتا ورتادا جاعىلعان الاۋ باسىندا دا اندەرىن شىرقادى. وتكەن جىلدارداعى فەستيۆالدىڭ لاۋرەاتتارى مەن ديپلومانتتارى ونەر كورسەتتى.
وسى فەستيۆال جىلدا شىلدە ايىندا وتەدى. سول كەزدە ءوزىمىزدى ءبىر وي مازالايدى. ومىردەن ەرتە وزعان قازاقتىڭ تۇڭعىش بارد ءانشىسى تابىلدى دوسىموۆتىڭ تۋعان كۇنى ءدال وسى ايدا ەدى. «استانا» قالىپتاسقان فەستيۆال دەلىك, نەگە وعان بالاما رەتىندە تابىلدى دوسىموۆ اتىنداعى باردتىق اندەر فەستيۆالىن قولعا الماسقا؟! باردتىڭ ۇلى ابىل باستاعان, ەسەنباي قۇلي سەكىلدى تابىلدىنىڭ ءىزباسارلارى قازىر جەتەرلىك. وسى كۇندەرگە دەيىن اقتوبەدە جانە باردتىڭ تۋعان جەرى يندەر اۋدانىندا وسىنداي فەستيۆال وتكەن. الايدا تابىلدى ءومىر بويى ءوزى ستۋدەنتتىك كۇندەردىڭ قىزىعىن كەشكەن الماتىنى اڭساپ ءوتتى. سول الماتى نەمەسە ەلوردادا باردتى ەسكە الاتىن ۋاقىت جەتتى. سونى باردتىق اندەر فەستيۆالىن ۇيىمداستىرۋ فورماسىندا وتكىزۋگە ابدەن بولادى. كەلەسى جىلى تابىلدىنىڭ تۋعانىنا 55 جىل, ومىردەن وتكەنىنە 10 جىل تولادى. قازىردەن باستاپ بارد اتىنداعى فەستيۆالدى ۇيىمداستىرۋدىڭ قامىنا كىرىسكەن ءجون دەپ ويلايمىز.
