وتكەن اپتادا قازاقستان پرەمەر ليگاسىنىڭ كەزەكتى 21-تۋر ويىندارى اياقتالدى.
تۋر بارىسىندا «استانا» كومانداسى سىرت الاڭدا «تارازبەن» جولىقتى. بۇل بۇرىنعى باپكەر بەرانەكتىڭ ورنىنا كەلگەن يوانا اندونەنىڭ جەتەكشىلىگىمەن وتكەن ءبىرىنشى ويىن ەدى. العاشقى كەزدەسۋىندە جاقسى كورسەتكىشكە قول جەتكىزە الماۋىن اندونە بىرنەشە سەبەپپەن تۇسىندىرەدى. بىرىنشىدەن, «ءبىر اپتانىڭ ىشىندە ءبىر نارسەنى وزگەرتە قويۋ وڭاي ەمەس». ەكىنشىدەن, «ءوزىمنىڭ «تۋعان» كلۋبىما قارسى وينامايمىن» دەگەن كەلىسىمىنە سايكەس باۋىرجان يسلامحان الاڭعا شىقپاسا, جاراقاتىنا بايلانىستى تاعى ءبىر ورىنى بولەك فۋتبولشى ۇلان قونىسباەۆ ويىنعا قاتىسا المادى. ۇشىنشىدەن, سەرگەي وستاپەنكوعا دارىگەرلەر ويىنعا قاتىسۋعا رۇقسات بەرۋگە اسىعار ەمەس. ولاردىڭ ايتۋىنشا, شابۋىلشى جاراقاتىنان تولىق ايىققانشا ءبىراز كۇتۋ كەرەك. ال, جاڭا باپكەردىڭ بۇل جولعى جاڭالىعى مىناۋ بولدى: «تارازعا» قارسى ويىندا تاڭات نوسەرباەۆ پەن داۋرەنبەك تاجىمبەتوۆ شابۋىلشى رەتىندە ويناسا, برازيليالىق زەلاو كوماندا كاپيتانى بولىپ تاعايىندالدى.
سونىمەن, ويىنعا كەلەيىك. ويىننىڭ ءبىرىنشى تايمىندا الاڭ يەلەرى ەكپىندى شابۋىلدارىمەن ەرەكشەلەندى. 12-مينۋتتا وبيورا وديتا ەسەپ اشۋعا شاق قالعان, بىراق ءمۇلت كەتتى. سونداي-اق, قوناقتار ساپىنان 22-مينۋتتا فوكسي دانيار قوياشەۆيچتىڭ پاسىن گولعا اينالدىرۋ مۇمكىندىگىنە يە بولعان ەدى. وكىنىشكە قاراي, شابۋىل ءساتسىز اياقتالدى. ال, ەكىنشى كەزەڭ بىرىنشىسىنەن گورى ءسال سايابىر وتكەنىمەن, ەكى جاقتىڭ دا گول سالاتىن ساتتەرى بولدى. ءتىپتى, قوسىمشا ۋاقىتتىڭ وزىندە «استانالىق» پاتريك تۆۋماسيگە كومانداسىن العا شىعارۋ مۇمكىندىگى بەرىلگەن ەدى. بىراق, فۋتبولشىعا ءسال عانا ساتتىلىك جەتىسپەدى. ناتيجەسىندە, قوس كوماندا دا ءبىر-ءبىرىنىڭ وسال تۇسىن تابا الماي تارقاستى. ەسەپ – 0:0.
«ۆوستوك» پەن «شاحتەر» كوماندالارى دا وسىنداي ەسەپپەن تۋردى اياقتادى. ال, «اتىراۋ» «اقجايىقتان» جانە «اقتوبە» «ورداباسىدان» جاۋاپسىز ءبىر-ءبىر گولمەن باسىم ءتۇستى. ءوز كەزەگىندە «جەتىسۋ» 1:3-پەن «توبىلعا» تىزە بۇكتى. ەڭ تارتىستى ويىن «قايرات» پەن «ەرتىس» كوماندالارى اراسىندا ءوربىپ, الماتىلىق كلۋب نەبارى ءبىر دوپ ارتىقشىلىعىمەن جەڭىسكە قول جەتكىزدى – 3:2.
ەربول جانات
