استانادا الەمنىڭ 25 ەلىنىڭ تەننيسشىلەرى جۇلدە قورى 225 مىڭ دوللاردى قۇرايتىن قر پرەزيدەنتى كۋبوگىنا تالاستى. وكىنىشكە قاراي, قازاقستاندىق تەننيسشىلەر اقتىق سىندا جەڭىلىس تاپتى.
ەرلەر اراسىنداعى جەكەلەي كەزدەسۋدە ميحايل كۋكۋشكين بۇعان دەيىن كوماندالاسى اندرەي گولۋبەۆتەن باسىم تۇسكەن الەمنىڭ 97-ءشى راكەتكاسى, يزرايل سپورتشىسى دۋدي سەلامەن كەزدەستى. ءبىرىنشى سەتتە 7:5 ەسەبىمەن جەڭىسكە جەتكەن ميحايل كۋكۋشكين, كەلەسى سەتتە 2:6 ەسەبىمەن ۇتىلىپ قالدى. ءۇشىنشى سەتتىڭ باسىندا قازاقستاندىقتىڭ كەنەت بەلى اۋىرىپ, وعان مەديتسينالىق كومەك كورسەتىلدى. بۇل رەتتە كۋكۋشكين 6:7 ەسەبىمەن جەڭىلدى. ماتچ 2 ساعات 59 مينۋتقا جالعاستى.
جەڭىمپاز اتانعان سەلا 18 مىڭ دوللار سىياقىعا يە بولىپ, اتر رەيتينگىسى بويىنشا 110 ۇپاي ەنشىلەدى.
قازاقستاندىقتار جۇپتىق كەزدەسۋدە دە ەسە جىبەردى. فينالدا اندرەي گولۋبەۆ پەن ميحايل كۋكۋشكين تەگەۋرىندى تەكەتىرەستە يتاليالىق جۇپ ريككاردو گەدين مەن كلاۋديو گراسسيگە جول بەردى. ماتچتىڭ ناتيجەسى – 6:3, 3:6, 10:8. بۇعان دەيىن جارتىلاي فينالدا وتاندىق تەننيسشىلەر تي چەن (تايپەي), يانگ-كۋ ليم (كورەيا) دۋەتىنەن 7:6, 3:6, 10:7 ەسەبىمەن باسىم تۇسكەن بولاتىن.
ايەلدەر اراسىنداعى جۇپتىق كەزدەسۋدە ۋكراينا سپورتشىلارى – اپالى-ءسىڭلىلى كيچەنوكتار جەڭىمپاز اتاندى. ولار اقتىق سىندا رەسەيلىك جۇپ نينا براتچيكوۆا مەن ۆالەريا سولوۆەۆادان ايلاسىن اسىردى.
نادەجدا كيچەنوك ايەلدەر اراسىنداعى جەكەلەي سىندا دا توپ جاردى. شەشۋشى كەزدەسۋدە ۋكراينا تەننيسشىسى 6:4, 7:5 ەسەبىمەن پرەزيدەنت كۋبوگىنىڭ بىلتىرعى جەڭىمپازى پورتۋگاليالىق ماريۋ جواو كوحلەردى جەڭدى.
ەربول جانات
