وسى اپتادا استانا قالاسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىندە اشىق ەسىك كۇنى ءوتتى. قالا تۇرعىندارى مەن قوناقتارى تولعاندىرىپ جۇرگەن ساۋالدارىنا مامانداردان تەگىن قۇقىقتىق كەڭەس الدى. شارا تۋرالى دەپارتامەنتتىڭ قۇجات اينالىمىن قامتاماسىز ەتۋ جانە باقىلاۋ ءبولىمى باستىعى الماگۇل كەنەباەۆا ايتىپ بەردى.
– الماگۇل ەرسىنقىزى, ەلوردالىقتارعا قۇقىقتىق ءتۇسىندىرۋدى ماقسات ەتكەن شارانىڭ ماڭىزى زور بۇگىندە. دەسە دە, ارتىقشىلىقتارىن اڭگىمەلەڭىزشى.
– بىرىنشىدەن, قۇقىقتىق ساۋاتتىلىقتى دارىپتەۋ. ەكىنشىدەن, ءتۇرلى ساناتتاعى حالىقتىڭ پىكىرىن تىڭداپ, زاڭنامالىق سيپاتتاعى سۇراقتارعا جاۋاپ بەرۋ, بىرلەسىپ شەشۋ. حالىقتى مەملەكەتتىك جانە قۇقىق قورعاۋ ورگاندارىمەن ەركىن تىلدەسۋگە مۇمكىندىك قاراستىرۋ. ايتىپ وتكەن ءجون, جاعىمدى ديالوگ كونسترۋكتيۆتى فورماتتا وتكىزىلدى. بارلىق ساۋالدارعا جاۋاپ بەرىلىپ, حالىق تاراپىنان ايتىلعان ۇسىنىستارعا جان-جاقتى ءمان بەرىلدى.
– شاراعا قارجى پوليتسياسىنان باسقا قانداي ورگاندار تارتىلدى؟
– كەزدەسۋدى كەشەندى ءارى ناتيجەلى وتكىزۋ ماقساتىندا كوپتەگەن مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى شاقىرىلدى. اشىق ەسىك كۇنى قۇقىق قورعاۋ ورگاندارىمەن قاتار استانا قالاسى اكىمدىگى, نوتارياتتىق پالاتا جانە ادۆوكاتتار القاسى, تۇتىنۋشىلار قۇقىعىن قورعاۋ وداعى, «جاڭا قۇرىلىس» جشس وكىلدەرى قالا تۇرعىندارىنىڭ بارلىق سۇراقتارىنا جاۋاپ بەردى.
– حالىقتى قانداي ساۋالدار ءجيى مازالايدى ەكەن؟
– قۇقىقتىق كەڭەس الۋعا جالپى سانى ەلۋدەن استام ادام كەلدى. تۇرعىنداردى كوبىنە جۇمىسسىزدىق ماسەلەسى مازالايدى. ۇلەسكەرلىك تۋرالى كەڭەس سۇراعاندارمەن قاتار, ءبىزدىڭ دەپارتامەنتتەگى وندىرىستىك قىلمىستار تۋرالى ماسەلەلەر قاراستىرىلدى.
– ادەتتە, اشىق ەسىك كۇنىندە ازاماتتار وزدەرى بارىپ, قۇقىقتىق كەڭەس الادى. ال قۇقىقتىق كەڭەس الۋعا مۇقتاج مۇمكىندىگى شەكتەۋلى جاندار ەسكەرىلدى مە؟
– ءبىزدىڭ دەپارتامەنتتە ءوز ەركىمەن قوزعالۋعا مۇمكىندىگى جوق ازاماتتار مەن سوعىس ارداگەرلەرى ءۇشىن ارنايى ءموبيلدى توپ قۇرىلعان.
گۇلميرا ايماعانبەت
