تەمەكى تۇقىلىن كورىنگەن جەرگە تاستاعان ادامدار دا اكىمشىلىك جازاعا تارتىلادى. كۇنى كەشە تارتقان شىلىمىن قوقىس جاشىگىنە ەمەس, تۋرا بالالار وينايتىن اۋلاعا لاقتىرعان ازامات پوليتسيانىڭ قۇرىعىنا ءىلىندى.
«ۋچاستوك» جەدەل الدىن الۋ شاراسىن وتكىزۋ كەزىندە ۋچاسكەلىك ينسپەكتور باۋىرجان قاسەنوۆ سەيفۋللين كوشەسىندەگى, 29-ءۇيدىڭ ماڭايىندا ءبىر ازاماتتىڭ تەمەكى تۇقىلىن تاستاعانىن بايقاپ قالعان. ينسپەكتور بىردەن 18 جاستاعى ازاماتقا اكىمشىلىك حاتتاما تولتىرىپ, ارنايى شەشىم شىعارۋعا قۇجاتتى استانا قالاسى مامانداندىرىلعان اۋدانارالىق اكىمشىلىك سوتىنا جىبەرگەن. سوت «ۇساق بۇزاقىلىق» ءىسى بويىنشا الگى ازاماتقا 10 ايلىق ەسەپتىك كورسەتكىش كولەمىندە ايىپپۇل سالدى. بۇل – 21210 تەڭگە دەگەن ءسوز.
استانا قالاسى ىشكى ىستەر دەپارتامەنتى جەرگىلىكتى پوليتسيا قىزمەتىنىڭ ينسپەكتورى ءلاززات بيسەمباەۆانىڭ مالىمدەۋىنشە, بۇگىنگە دەيىن ۋچاسكەلىك ينسپەكتورلار 3493 ۇساق بۇزاقىلىقتى انىقتاپ, ماتەريالداردى سوتقا جىبەرگەن. ونىڭ ىشىندە 378 ازامات اكىمشىلىك قاماۋعا الىنسا, 3115-ىنە ايىپپۇل سالىنعان.
پوليتسيا قىزمەتكەرلەرى كەز كەلگەن بۇزاقىلىق ەلەۋسىز قالمايتىنىن, اكىمشىلىك جازاعا ىلىككەندەر نە ايىپپۇل تولەيتىنىن, نە 10 كۇنگە دەيىن اكىمشىلىك قاماۋعا الىناتىنىن ەسكەرتەدى.
قىمبات نۇرعالي
