«نۇر وتان» پارتياسىنىڭ ەلوردالىق فيليالى مەن استانا قالاسىنىڭ دەنە شىنىقتىرۋ جانە سپورت باسقارماسى دۇنيەجۇزىلىك توعىزقۇمالاق فەدەراتسيامەن بىرلەسىپ «Astana Open-2016» رەسپۋبليكالىق بايقاۋىن ۇيىمداستىردى.
ەل تاۋەلسىزدىگىنىڭ 25 جىلدىعىنا وراي ءارى پارتيانىڭ «ۇلى دالا ەلى» اتتى باعدارلاماسىنا سايكەس وتكىزىلىپ وتىرعان باسەكەدە 200-گە جۋىق وقۋشى ۇلتتىق ويىن تۇرلەرى – توعىزقۇمالاق پەن بەستەمشەدەن باق سىنايدى. فەستيۆالدىڭ اشىلۋ سالتاناتىندا ءسوز سويلەگەن «نۇر وتان» پارتياسى ەسىل اۋداندىق فيليالى ءتورايىمىنىڭ ورىنباسارى احمەت سەيىتوۆ: «اتالمىش ويىن تۇرلەرى ەجەلگى حاندار مەن بيلەر داۋىرىنەن بەرى تانىمال. بۇل يگى ءداستۇر بۇگىن دە جوعالعان جوق. قازىرگى تاڭدا قازاقستاننىڭ 100 مىڭنان اسا تۇرعىنى توعىزقۇمالاقپەن اينالىسادى ەكەن. سولاردىڭ اراسىنداعى ەڭ جاس تولقىن – وزدەرىڭسىڭدەر» دەپ جەتكىنشەكتەرگە ساتتىلىك تىلەدى. سالتاناتتى جيىنعا ماقسات شوتاەۆ, اينۇر جاقىپباەۆا, عابيدوللا نۇرشين, ارىستان قاپاەۆ, ءبىلىمجان ەلەۋسىنوۆ سىندى بەلگىلى جاتتىقتىرۋشىلار مەن عالىمجان تەمىرباەۆ, ايدوس سەيىتجان, نۇربەك قاليەۆ, سەرىك اقتاەۆ سەكىلدى ۇلتتىق ويىننان الەم چەمپيوندارى قاتىستى.
ماۋسىمنىڭ 5-ىنە دەيىن جالعاساتىن وسى جارىستىڭ جەڭىمپازدارى تامىز ايىندا قىتايدا بولاتىن ازيا چەمپيوناتىنا جولداما الادى.
بوتاگوز ماراتقىزى
