حالىقارالىق بالالاردى قورعاۋ كۇنىنە ارنالعان استاناداعى مەملەكەتتىك مامانداندىرىلعان بالالار ۇيىندە ىزگىلىكتى مەرەكەگە ارنالعان عاجايىپ ءبىر شارا ءوتتى. وعان بەلگىلى تۇلعالار مەن تانىمال انشىلەر قاتىستى.
ومىردە بالا كۇلكىسىنەن ارتىق باقىت جوق. سوندىقتان بولار, جالپاق الەم بالالار قورعاۋ كۇنىن ەرەكشە اتاپ وتەدى. مامانداندىرىلعان بالالار ۇيىندە ايتۋلى مەرەكە جىل سايىن جوعارى دەڭگەيدە وتكىزىلەدى. بۇگىنگى تاڭدا اتالعان مەكەمەدە 4 جاسقا دەيىنگى بالعىندار تاربيەلەنۋدە. ولارعا بارلىق جاعداي جاسالعان.
مەرەكەلىك شاراعا قر ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا قاتىسىپ, بالعىندارعا ىزگى لەبىزىن ءبىلدىرىپ, باعالى سىيلىقتار تابىس ەتتى. استانا قالالىق ادىلەت باسقارماسىنىڭ قىزمەتكەرلەرى كىشكەنتايلارعا قۇرمەت كورسەتتى. سونداي-اق, شارا بارىسىندا ەلىمىزگە تانىمال «جىگىتتەر» كۆارتەتى تاماشا اندەرىن شىرقادى. رەسەيلىك «گرادۋسى» توبىنىڭ انشىلەرى دە بالعىندار كوڭىلدەرىن كوتەرىپ, ءتۇرلى ويىندار ۇيىمداستىردى.
– بۇگىن وتە ەرەكشە كۇن. اسىرەسە, بالعىنداردىڭ قۋانىشىندا شەك جوق. كىشكەنتايلارعا ارناپ «ماقتا قىز» ەرتەگىسىن قويدىق. ءالى دە مەرەكەلىك شارالار اپتا بويىنا جالعاسادى. ەرتەڭ بالالاردى ۇلتتىق مۋزەيگە اپارامىز, ودان كەيىن استانالىق تسيرككە بارامىز . سونىڭ بارلىعى كىشكەنتايلار ءۇشىن جاسالىپ جاتقان ىزگىلىكتى ءىس, – دەيدى مامانداندىرىلعان بالالار ءۇيىنىڭ اعا تاربيەشىسى گاۋھار ابىلسەيىتوۆا.
ازامات ەسەنجول
