تۇقىمىمىزدى تۇزداي قۇرتايىن دەدى مە؟!

گازەتىمىزدىڭ 23 قاڭتار كۇنگى №9 نومىرىندە «ەكو: سوڭعى ءۇمىتتىڭ ساۋداسى» اتتى ەلىمىزدەگى بەدەۋ ايەلدەردى قولدان ۇرىقتاندىرۋ ماسەلەلەرىنە قاتىستى ماقالا جاريالانعان ەدى. بالاسىز ءۇيدى مازارعا تەڭەيتىن قازاقتىڭ ۇرپاعىنا دەگەن كوزقاراسى ەرەكشە ەكەنى ايتپاسا دا بەلگىلى. الايدا بۇگىنگى ەكستراكورپورالدىق ۇرىقتاندىرۋ عىلىمىنىڭ دامۋ بارىسىندا قازاقتىڭ ءداستۇرلى دۇنيەتانىمىنداعى, مىڭ جىلدىق تاجىريبەسىندەگى ۇرپاق جالعاستىعىنا قايشى ارەكەتتەر ورىن الىپ وتىرعانىنا كۋا بولىپ ءجۇرمىز.

راس, ۇرپاقسىز قالۋدىڭ قاسىرەتىن تارتىپ جۇرگەن وتباسىلاردىڭ بارىن جوققا شىعارمايمىز. سولاردىڭ ءالسىز ءۇمىتىن وياتقان جارناما كوپبەدەۋەگەن بەدەۋ ايەلدەردى بەيمالىم جولعا تاۋەكەل ەتكىزىپ وتىر. وكىنىشكە قاراي, وڭدى-سولدى تەك كوممەرتسيالىق ماقساتتاعى جارنامالار – نارەستەنىڭ دۇكەن سورەسىندە تۇرعانداي ەتىپ جەتكىزۋدە. تەك ۋىستاپ اقشا اكەلىپ ساتىپ الۋ عانا قالعانداي. شىندىعىندا, ءجۇز ايەلدىڭ وتىزىنا عانا, وندا دا بەس-ون رەت اينالىپ سوققاندا عانا تۇقىم بايلاناتىنىن ەسكەرە بەرمەيدى, ءىستىڭ باسىندا ونى ەسكەرتپەيدى دە. قالعان جەتپىسىنىڭ شاتقاياقتاپ تۇرعان دەنساۋلىعى ونسىزدا ەم بارىسىندا ءتۇرلى گورموندى دارىلەردى قابىلداعان سوڭ دەرتى اسقىندىرا تۇسەدى.
اقىرىندا, پسيحولوگيالىق جاعىنان دا مۇگەدەك بولىپ قوساعىنىڭ دا شىدامى تاۋسىلىپ, ونسىز دا قيۋى كەتكەن وتباسىنىڭ شىرقى بۇزىلىپ جاتىر.
بۇرىندارى بەدەۋ ايەلدەر تۋرالى كوپ ايتا بەرمەيتىن, بالەسى جۇعادى دەپ ولاردىڭ جاقسىلىقتىڭ ورتاسىندا جۇرگەنىن قالامايتىن. بۇل دا از اۋىرتپالىق ەمەس. ايەلدەردىڭ سونداي ءحالىن بىلە تۇرا, ولاردىڭ نازىك سەزىمىندە ويناۋعا قاقىمىز جوق. عايىپتان كەلگەن سۇيىنشىدەي عالىمنىڭ جەتىستىگىن دە جوققا شىعارۋعا بولماس. سوڭعى جىلدارى بۇكىل بۇقارالىق اقپارات قۇرالدارىنان جەتىپ جاتقان جارناما بۇل ماسەلەگە باسقاشا كوزقاراسپەن قاراۋعا سەبەپ بولۋدا.
سونىمەن, جازىلعان جايدىڭ جاڭعىرىعىنا ورالعانىمىزدىڭ سەبەبى رەداكتسيامىزعا كەلىپ جاتقان كوپتەگەن پىكىرلەردىڭ اراسىنان سەكسەنگە كەلگەن باتىر انا ورىنباسار قۋاندىققىزىنىڭ «تۇقىمىمىزدى تۇزداي قۇرتايىن دەدى مە؟» دەگەن جانايقايى ەدى.
كوپ جاساعان قاريا, جالپى اتى-ءجونى جوق, بەيمالىم بىرەۋلەردىڭ ۇرىعىن ايەلدەردىڭ جاتىرىنا سالىپ, تەگى جوق, ءتورى جوق قازاقتىڭ تاعى ءبىر ۇرپاعىنىڭ پايدا بولۋىنا مۇلدەم قارسى. ال اتالىق ۇرىقتاردى شەتەلدەن الىپ كەلەدى دەگەن دەرەكتى ءتىپتى قابىلداي المايدى.
رەپرودۋكتيۆتى مەديتسينا باعدارلاماسى ەنگىزىلگەلى بەرى 12 000 ءسابيدىڭ دۇنيەگە كەلگەنىن ويلاعاندا, كوپتى كورگەن قاريانىڭ جانايقايىن تۇسىنگەندەي بولاسىڭ.

ايگۇل ۋايسوۆا