بيىل 20 قاراشادا وتەتىن پرەزيدەنت سايلاۋىنا دەنساۋلىق ساقتاۋ سالاسىنىڭ قىزمەتكەرلەرى تۇگەل قاتىسادى. سونىڭ ىشىندە ءبىزدىڭ اۋرۋحانا ۇجىمىندا 1300-دەي ادام ەڭبەك ەتسە, سولاردىڭ ءبارى سايلاۋعا بارادى. بۇل تۋرالى كۇندەلىكتى جينالىستا ايتىپ, الداعى سايلاۋدىڭ ەلىمىزدىڭ ومىرىندەگى ماڭىزىنا توقتالىپ وتىرامىز.
جالپى بۇل سايلاۋدان حالقىمىز كوپ ءۇمىت كۇتەدى. اسىرەسە, دەنساۋلىق سالاسى ماماندارىنىڭ ەرتەڭگە دەگەن سەنىمى مول. ۇمىتكەرلەر ىشىندە قاسىم-جومارت كەمەلۇلىنىڭ سايلاۋالدى باعدارلاماسىن تالقىلاپ, كوكەيگە قونىمدى كوپتەگەن ماسەلەلەردىڭ كوتەرىلگەنىنە كوز جەتكىزدىك. اتاپ ايتقاندا, بىزگە ءبىرىنشى كەزەكتە ۇناعانى – اۋىل مەديتسيناسىن كوتەرۋ, ءدارى-دارمەكتى 50 پايىز ءوز ەلىمىزدە شىعارۋ, دارىگەر ماماندىعىنىڭ مارتەبەسىن ارتتىرۋ جايىندا ايتقاندارى. سوڭعى ماسەلە بويىنشا جۇمىستار باستالىپ كەتتى قازىر. نەگە دەسەڭىز, سوڭعى كەزدەرى دارىگەرلەردى كوپ جاعدايدا نەگىزسىز قارالاۋ, شاعىمدانۋ كوبەيىپ, مەديتسينا قىزمەتكەرلەرىنىڭ بەدەلى ءتۇسىپ كەتتى. مىڭ ادامدى ەمدەپ, ءبىر ادام ەمدەلمەي قالسا, سونى الەۋمەتتىك جەلىگە جازىپ جىبەرىپ, سوعان ءبارى اۋزىنا كەلگەنىن ايتىپ, ءتىپتى اق حالاتتىلارعا قول كوتەرەتىندەر دە كوبەيدى. سونىڭ سالدارىنان دارىگەر بولۋدى قالايتىن جاستار ازايىپ بارادى. ماماندار ونسىز دا جەتىسپەي جاتقاندا, ودان سايىن قۇردىمعا كەتىرۋگە بولمايدى. سوندىقتان باق سالاسى دا وتقا ماي قۇيماي, اق-قارانى اجىراتىپ بارىپ جازسا, كورسەتسە دەيمىز.
سونىمەن قاتار ونكولوگيالىق ەمدەۋ سالاسىن كوتەرەمىز دەپ جاتىر. سەبەبى قازىر حالىقتىڭ ءومىر ءسۇرۋ ۇزاقتىعى ارتىپ كەلەدى. سوعان بايلانىستى, ياعني ەگدە جاستاعى ادامداردىڭ سانى كوبەيگەن سايىن ونكولوگيالىق اۋرۋلار سانى دا وسەتىن بولادى. تاعى ءبىر وزەكتى ماسەلە – پروفيلاكتيكالىق جۇمىستار ساپاسىن ارتتىرۋ ءۇشىن ءسوس, ياعني سالاۋاتتى ءومىر سالتىن ساقتاۋ مادەنيەتىن كۇشەيتۋ. ويتكەنى, حالىقتىڭ وسى جاعىنان ساۋاتى كەمدەۋ, كوپ ازاماتتار دۇرىس تاماقتانباي, دەر كەزىندە قارالماي, سپورتپەن اينالىسپاي, جالپى سالاۋاتتى ءومىر ءسۇرۋدى داعدىعا اينالدىرماي ءومىر سۇرەدى. سوسىن ابدەن اسقىنعان كەزدە كەلىپ, بارىنە دارىگەرلەردى كىنالايدى. ورتاق جاۋاپكەرشىلىك دەگەن بولادى. اركىم ءوز دەنساۋلىعىنا ءوزى قاراپ, جاۋاپكەرشىلىك الۋى كەرەك. سونداي-اق اقپاراتتىق جۇيەنى دامىتىپ, ەسەپتىلىكتى ازايتپاق.
ءبىزدىڭ اۋرۋحانا ءۇشىن تاعى ءبىر ۇلكەن جاڭالىق – مەكەمەمىزدى قازىرگى ەسكى ورنىنان Ramada Plaza قوناق ءۇيى عيماراتىنا كوشىرەتىن بولدى. قازىرگىسى – 1957 جىلى سالىنعان, بۇگىندە قابىرعاسى قۇلاعالى تۇرعان بۇرىنعى تەمىرجول اۋرۋحاناسى عوي. مىنە, ەندى پرەزيدەنتتىڭ تاپسىرماسىمەن جانە قالا اكىمى التاي كولگىنوۆتىڭ قولداۋ كورسەتۋىمەن جاڭا عيماراتقا كوشەمىز. قازىر ول جاققا اكىمدىك جوندەۋ جۇرگىزگەلى جاتىر. ال جاڭا كلينيكا سالار بولسا وعان 120-150 ملرد تەڭگە قاجەت بولىپ, ونى بىرنەشە جىل كۇتۋگە تۋرا كەلەر ەدى. سوندىقتان دايىنا عيماراتقا كوشىپ, كوپ ۇزاماي شەتەلدەگىدەي بيىك, زاماناۋي اۋرۋحاناعا اينالامىز. ونىڭ ءىشىن دە, قىزمەتتەرىن دە حالىقارالىق دەڭگەيدەگى تالاپتارعا ساي ەتەمىز. سەبەبى ءبىزدىڭ حالقىمىز شەتەلگە بارماي-اق ءوز ەلىندە تۇرىپ جايلى دا جاعدايى جاسالعان جەردە ەم الۋعا ابدەن لايىقتى. ودان بولەك اكىمدىك قاجەتتى تەحنيكانى الىپ بەرەمىز دەپ وتىر. ەسكى عيماراتتىڭ ورنىن بۇزىپ, ول جەرگە 250 ورىندىق جاڭا پەرزەنتحانا سالماق. سەبەبى قالا وتە جىلدام ءوسىپ كەلەدى, بالا تۋ كورسەتكىشى بويىنشا بۇرىنعىعا قاراعاندا جىلىنا مىڭ بالاعا كوپ تۋىلاتىن بولدى. وسىنداي ىرگەلى جۇمىستار جۇرگىزىپ, ءبىزدى قولداپ جاتقان قالا اكىمدىگىنە, مەملەكەت باسشىسىنا العىسىمىزدى بىلدىرەمىز. بارشا قازاقستاندىقتاردى, ارىپتەستەرىمدى الداعى سايلاۋدا لايىقتى كانديداتقا داۋىس بەرۋگە شاقىرامىن. ءبىزدىڭ ساياسي بەلسەندىلىگىمىز ەلىمىزدىڭ ەرتەڭىن جارقىن, بالالارىمىزدىڭ بولاشاعىن باقىتتى ەتۋگە سەپتىك ەتەرى ءسوزسىز.
جۇلدىز دانباەۆا,
جوعارى ساناتتى دارىگەر,
№3 قالالىق كوپبەيىندى اۋرۋحانانىڭ ديرەكتورى
