گەنەرال س.نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىندە «دارىن» مەملەكەتتىك جاستار سىيلىعىنىڭ جانە قازاقستان جۋرناليستەر وداعى سىيلىعىنىڭ لاۋرەاتى, چەرنوبىل اپاتىنىڭ جانە قر قارۋلى كۇشتەرىنىڭ ارداگەرى مارات ءجۇنىس-بەكتىڭ باستاماسىمەن «ارداگەرلەرىم – ارداقتىلارىم» اتتى شىعارماشىلىق بايقاۋ ءوتتى.
بايقاۋدىڭ ماقساتى – اۋعان سوعىسىنىڭ, تاجىك-اۋعان شەكاراسىنداعى قاقتىعىستىڭ, سەمەي سىناق پوليگونى قاسىرەتىن جانە چەرنوبىل اتوم ەلەكتر ستانساسىنداعى تەحنوگەندىك جارىلىسىنىڭ تاريحي ماعىنالىق اقيقاتىن اشۋ.
«ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسى تۇراقتى كوميسسياسىنىڭ توراعاسى, قوعام قايراتكەرى ورازكۇل اسانعازىقىزى, اۋعان سوعىسى مەن چەرنوبىل اپاتى ارداگەرلەرى قۇرمەتتى قوناق رەتىندە قاتىسقان ءىس-شارا بارىسىندا اۋعان سوعىسى, چەرنوبىل اپاتى جايلى فيلمدەر كورسەتىلدى. ۇلاندار مۇحامەد نۇرجانات «اۋعان ەرلەرىن ەسكە الۋ» اتتى ءوز ولەڭىن وقىسا, قۋانىش سارقىتپاەۆ «جاسا, قازاق!» انىمەن, مەكتەپ قىزمەتكەرى الىبەك التىنباەۆ «وفيتسەرلەر» انىمەن كورەرمەننىڭ كوڭىلىن كوتەردى. مەكتەپ ۇلاندارى سەمەي پوليگونىنىڭ قاسىرەتى تۋرالى قولونەر تۋىندىلارىن كورسەتتى.
قورىتىندى سوزىندە مەكتەپ باسشىسى, گەنەرال-لەيتەنانت قۇربان قاراجانوۆ وسىنداي ءىس-شارالار بولاشاق ۇرپاقتىڭ بويىندا پاتريوتيزم سەزىمىن قالىپتاستىراتىنىن ايتا كەلىپ, بايقاۋدىڭ ەكىنشى كەزەڭى جالعاساتىنىن, ونىڭ قورىتىندىسى جىل اياعىندا شىعارىلاتىنىن جەتكىزدى.
مەرۋەرت سماعۇل,
گەنەرال س.نۇرماعامبەتوۆ اتىنداعى
«جاس ۇلان» رەسپۋبليكالىق مەكتەبىنىڭ
يدەولوگيا جانە ارنايى ناسيحاتتاۋ بويىنشا وفيتسەرى
