اقمولا وبلىسىندا تۇرعىن ءۇي قۇرىلىسىن اياقتاۋ ءۇشىن 200-دەن استام ۇلەسكەر كووپەراتيۆكە بىرىكتى. قوسشى اۋىلىندا «جايلاۋ» تۇرعىن ءۇي كەشەنىنىڭ ۇلەسكەرلەرى مەردىگەر كومپانياعا الدانىپ قالعان سوڭ, بولاشاق تۇرعىن ءۇي كەشەنىنىڭ قۇرىلىسىن اياقتاۋ ءۇشىن «جايلاۋ city» تۇرعىن ءۇي كووپەراتيۆىن قۇردى. ەندى الداعى 45 كۇننىڭ ىشىندە كوپتەن كۇتكەن تۇرعىن ءۇي كەشەنىءنىڭ قۇرىلىسى باستالادى.
2014 جىلى قۇرىلعان «ءال باراكات» كومپانياسىنىڭ باسشىسى ۇلەسكەرلەردەن ءىرى كولەمدەگى قاراجات سوماسىن ۇرلاعانى جانە ىسىراپ ەتكەنى ءۇشىن 8 جىلعا سوتتالدى. ءىستى بولعان كومپانيا سول جىلى 200 ۇلەسكەردىڭ اقشاسىمەن تۇرعىن ءۇي قۇرىلىسىن باستاپ, اياقتاماعان. 78 سوت وتىرىسى وتسە دە زارداپ شەككەندەردىڭ قۇرىلىسقا سالعان قارجىسى قايتارىلعان جوق. بىراق ولار جەر ۋچاسكەسىن يەلەنۋگە قۇقىق الدى, قازىر جاڭا «سيرەنەۆىي ساد» تۇرعىن ءۇي كەشەنىنىڭ قۇرىلىسى جوسپارلانىپ وتىر.
بولاشاق كەشەن استانالىق كونگلومەراتسيانىڭ ەكولوگيالىق تازا اۋدانىندا ورنالاسقان. ول 647 پاتەرگە ەسەپتەلگەن 9 قاباتتى ءتورت ۇيدەن تۇرادى. ءبىر شارشى مەترىنىڭ قۇنى – 160 مىڭ تەڭگە.
«جايلاۋ city» تقك توراعاسى گۇلنار مەرمۇقانوۆانىڭ ايتۋىنشا, كووپەراتيۆ مۇشەلەرى ءوز ماقساتتارىنا وتە ۇزاق ۋاقىتتان سوڭ جەتتى. بىرەۋلەر اقشاسىنان عانا ەمەس, دەنساۋلىعىنان دا ايىرىلدى.
«2016 جىلى جەر تەلىمىن العان كەزدە بىزدە ءۇمىت پەن ماقسات پايدا بولدى, ول – بارلىعىن اياعىنا دەيىن جەتكىزۋ. بىزدە قازىر قۇرىلىسقا دايىندىق, ماتەريالدى ىرىكتەۋ, ءونىم بەرۋشىلەر مەن قۇرىلىس ماتەريالدارىن ىزدەۋ جۇمىستارى جۇرگىزىلۋدە. ءبىز ءۇشىن قۇقىق بەلگىلەيتىن قۇجاتتاردى الۋ وتە ماڭىزدى جانە قىمبات. بارلىق دايىندىق قۇجاتتارى ءبىزدىڭ قولىمىزدا, سوڭعى جۇمىس جوباسىنىڭ مەملەكەتتىك ساراپتاماسىنان ءوتۋ عانا قالدى, سودان كەيىن كەشەندى سالۋعا كىرىسە الامىز» دەيدى كووپەراتيۆ باسشىسى.
