وتكەن سەيسەنبى كۇنگى ۇكىمەت وتىرىسىنان كەيىن ءبىلىم جانە عىلىم ۆيتسە-مينيسترلەرى ەلميرا سۋحانبەرديەۆا جانە بيبىگۇل اسىلوۆا ءبىلىم سالاسىندا قولعا الىنعان جوبالار جايىندا بريفينگ وتكىزدى.
ەلباسى جاقىندا عانا قازاقستان حالقىنا ارناعان جولداۋىندا ءبىلىم سالاسىنا جاڭا مىندەتتەر جۇكتەدى. ەندى ونى ورىنداۋ ءۇشىن اتالعان مينيسترلىك بىرقاتار شارالاردى قولعا العان. ە.سۋحانبەرديەۆانىڭ ايتۋىنشا, جەرگىلىكتى اتقارۋ ورگاندارىمەن بىرلەسكەن جول كارتاسى جاسالىپ, وسى باعىتتا جۇمىس توبى قۇرىلعان. بيىلعى ماۋسىم ايىندا مۇعالىمدەر العاش رەت ۇلتتىق تەست تاپسىردى. وسى بىلىكتىلىك تەستىلەۋدەن 56910 پەداگوگ وتكەن. ەندى ولار قىركۇيەكتەن باستاپ جاڭا جۇيەمەن جالاقى الا باستادى. تەستىلەۋدىڭ ەكىنشى كەزەڭى الداعى قاراشا ايىندا وتەدى.
قازىرگى كۇندە ەلىمىزدەگى مەكتەپتەر مەن بالاباقشالاردىڭ 80 پايىزى بەينەباقىلاۋ كامەرالارىمەن جابدىقتالعان. وسى جوبانى جۇزەگە اسىرۋدا اتىراۋ وبلىسى كوش باستاپ تۇر. بۇل ايماقتا ءبىلىم بەرۋ ۇيىمدارىنىڭ 87 پايىزى بەينەباقىلاۋمەن جاراقتالعان. ەندى الداعى ءۇش جىلدا بۇل جۇمىس تولىق اياقتالادى. سونداي-اق, ءبىلىم جانە عىلىم ۆيتسە-ءمينيسترى بيبىگۇل اسىلوۆانىڭ سوزىنە زەر سالساق, 2023 جىلعا قاراي جالپى ءبىلىم بەرۋ سالاسىنا جۇمسالاتىن شىعىندار ءبىرشاما ارتادى ەكەن.
«الداعى جىلدان باستاپ بالاباقشا ماماندارىنىڭ ەڭبەكاقىسى وسەدى. پەداگوگتاردىڭ مارتەبەسى تۋرالى زاڭدى ازىرلەۋ اياسىندا مەكتەپ باسشىلىعىنىڭ دا جالاقىسىن كوتەرۋ قاراستىرىلدى. سونىمەن قاتار, سىنىپ جەتەكشىسى جانە مۇعالىمدەردىڭ وقۋشىلار داپتەرىن تەكسەرگەنى ءۇشىن دە جالاقىنى ءوسىرۋ ەسەپتەلدى. بۇل ماقساتتارعا رەسپۋبليكالىق بيۋدجەتتەن قوسىمشا قارجى بولىنەدى» دەدى ۆيتسە-مينيستر.
