ۇتىمسىز ۇسىنىس

«قازانشىنىڭ ەركى بار, قايدان قۇلاق شىعارسا» دەمەكشى, ۇلتتىق بانك «قر-داعى قولما-قول شەتەل اقشاسىن ايىرباستاۋ وپەراتسيالارىن ۇيىمداستىرۋ قاعيدالارىن بەكىتۋ تۋرالى» قاۋلى شى­عاردى. بۇل قاۋلى اقشا ايىر­باستايتىن نۇكتەلەردىڭ جۇمىسىن قيىنداتادى. ءسويت­­كەنى ەمەي نەمەنە, اقشا ايىر­باستاۋ نۇكتەلەرى كۇندىزگى ساعات 10-نان كەشكى 7-گە دە­يىن عانا جۇمىس ىستەيدى. ول ول ما, اقشا ايىرباستاۋعا كەلگەن ادام كاسسيرگە اتى-ءجونىن, جەكە باسىنىڭ كۋالىگىن جازىپ بەرەدى. تاعى ءبىر سوراقى ۇسىنىس, ءبىر ادام 500 مىڭ تەڭگەدەن ارتىق اقشا اۋىس­تىرا المايدى. بۇعان قوسا, اقشا اۋىستىرۋ نۇكتەلەرىنىڭ قوجايىندارىنىڭ قالتاسىندا 100 ميلليون تەڭگەسى بولۋى شارت.
«جەر استىنان جىك شىقتى, ەكى قۇلاعى تىك شىقتى» دەگەندەي, ۇلتتىق بانكتىڭ اتىشۋلى قاۋلىسىنا ساراپشى-ماماندار مەن كاسىپكەرلەر ۇلكەن كۇمانمەن قاراۋدا. الەمدىك ەكونوميكا جانە حالىقارالىق قاتىناستار ينستيتۋتىنىڭ ديرەكتورى اكىمجان ارۋپوۆ بۇل قاۋلى كۇشىنە ەنەتىن بولسا, شاعىن جانە ورتا بيزنەس تۇگىل, ءىرى بيزنەس­تىڭ ءوزى كولەڭكەلى بيزنەسكە كوشۋى ىقتيمال. «ءبىز زاڭسىز ۆاليۋتا نارىعىن «تىرىلتەمىز». ونىڭ ناتيجەسى وتە قورقىنىشتى بولماق: اقشا ايىر­باستاۋ سالاسىندا قىلمىس ءورشيدى. مۇنداي قاتاڭ شارالار جاعدايدى ۋشىقتىرىپ جىبەرەدى. ماسەلەن, اقشانى جاسىرىن قولما-قول ساتاتىنداردىڭ ساۋداسى قىزادى. ءبىر ادامعا 500 مىڭ تەڭگەدەن اسا اقشا ايىرباستاۋعا نەمەسە ساتۋعا بولمايدى دەگەن ۇسىنىستىڭ ءوزى كۇلكىلى. سوندا 15 مىڭ اقش دوللارىنان اساتىن باسپاناسىن ساتقاندار نە ىستەيدى؟» دەيدى ءا.ارۋپوۆ.
كاسىپكەر ايگۇل سالىبەكوۆا بۇل قاۋلى اقشا ايىر­باستاۋ نۇكتەلەرىن جابۋ ماقساتىندا شىعارىلىپ وتىر دەگەن پىكىردە. ول ءاربىر اقشا ايىرباستاۋ نۇكتەسىنىڭ قارجى قورىنىڭ 100 ملن تەڭگەگە دەيىن ءوسىرۋ كوپتەگەن كاسىپكەرلەردىڭ ناسىبىنەن ايى­رىلۋعا الىپ باراتىن قادام ەكەنىن ايتادى. ايتپاقشى, ۇلتتىق بانكتىڭ بۇل قاۋلىسى 16 تامىزعا دە­يىن عانا قوعامنىڭ تالقىسىنا تۇسپەكشى. ەندى ءالىپتىڭ ارتىن باعامىز…