مارات باشيموۆ, زاڭگەر: جاستاردىڭ جاڭاشىلدىعى ۇنادى
بۇل اپتانىڭ باستى وقيعاسى V استانا ەكونوميكالىق فورۋمى بولدى. بەس جىلدان بەرى جيىن جاھاندىق ماسەلەلەردىڭ شەشىمىن قاراستىراتىن حالىقارالىق الاڭعا اينالدى دەسەك ارتىق ەمەس.
فورۋمعا الەمنىڭ مىقتى ەكونوميستەرى, نوبەل سىيلىعىنىڭ لاۋرەاتتارى مەن لاۋازىمدى ساياسي تۇلعالارى كەلدى. جاستار جاعى وتە كوپ جينالدى. ارينە, مۇنداي ءىرى ساياسي وقيعالار, تانىمال تۇلعالاردىڭ ساپارى قازاقستان ءۇشىن ۇردىسكە اينالعان. بىراق, بۇل جولعى جيىننىڭ مەن بايقاعان ءبىر ارتىقشىلىعى – وتە اشىق, دەموكراتيالى تۇردە ءوتتى. ولاي دەيتىنىم, جاستار نوبەل سىيلىعىنىڭ يەگەرلەرىن, شەتەلدىڭ ەكس-پرەزيدەنت, ەكس-پرەمەر-مينيسترلەرىن جۇزبە-ءجۇز كورىپ, پىكىر الىسىپ جاتتى. كادىمگى تەرەزەسى تەڭ ادامشا. ماعان سونىسى قاتتى ۇنادى. جاقىندا استانادا قازاقستان زاڭگەرلەرىنىڭ سەزى بولدى. سەزد باستان-اياق رەسمي, قاتىپ قالعان قاعيدا بويىنشا ءوتىپ ەدى. ال, مۇندا ولاي ەمەس. كىم قايدا بارعىسى كەلەدى, قانداي جيىنعا قاتىسىپ, كىممەن پىكىرلەسكىسى كەلەدى ەرىك وزىنە بەرىلدى.
مەن كەزىندە كەڭەس ۇكىمەتىنىڭ ساياساتىن كورگەندەردىڭ قاتارىنانمىن. ونداي تۇلعالارمەن سويلەسۋ بىلاي تۇرماق, ءبىر جەردە باس قوسۋدىڭ وزىندىك شارتتارى بولادى دەگەن جازىلماعان قاعيدامەن وستىك. ال, قازىرگى جاستار ونداي ەمەس. ءوز پىكىرلەرىن كىمنىڭ الدىندا بولسىن قىسىلماي جەتكىزەدى. تەڭ ادامشا پىكىرلەسە الادى. سوعان وسى جولى تاعى ءبىر رەت كۋا بولىپ, ءبىراز مارقايىپ قالدىم.
فورۋم اياسىندا بۇۇ ۇيىمداستىرعان ادام قۇقىقتارى جونىندەگى كونفەرەنتسياعا قاتىستىم. ءوزىمنىڭ پىكىرلەرىممەن ءبولىستىم. رەسەيلىك ساياساتكەر الەكسەي ۆلاسوۆپەن, ءازىربايجاننان كەلگەن دەلەگاتسيا مۇشەلەرىمەن كەزدەسىپ, كەڭىنەن اڭگىمە-دۇكەن قۇردىق.
