قالا كوشەلەرىن كەشە جاس تۇلەكتەردىڭ قۋانىشتى كۇلكىسى مەن شاتتىق ءۇنى كەرنەدى. سوڭعى قوڭىراۋ اياقتالعان سوڭ, بەسىن اۋا مەكتەپ بىتىرۋشىلەرگە ارنالعان مەرەكەلىك ءىس-شارالار باستالعان. جاس تۇلەكتەر ارنايى باعدارلامالار ۇيىمداستىرىلعان «ستۋدەنتتىك», «عاشىقتار» ساياباقتارىنا جانە قارجى مينيسترلىگى الدىنداعى الاڭعا قاراي اعىلدى. وندا مەكتەپ وقۋشىلارىنىڭ كونتسەرتىن تاماشالاپ, قىزىقتى ويىن- ساۋىققا قانىقتى.
ۇزدىكتەرگە ۇكىلەپ ءۇمىت ارتۋ – قالىپتاسقان ءداستۇر. بۇل ورايدا, مەكتەپ بىتىرۋشىلەر اراسىنداعى «التىن بەلگى» يەگەرلەرى مەن وليمپيادا, عىلىمي بايقاۋلار جەڭىمپازدارى ءۇشىن ارنايى بال ۇيىمداستىرىلدى. «استانا دارىنى» وڭىرلىك عىلىمي-پراكتيكالىق ورتالىعى ۇيىمداستىرعان «تريۋمف» بالى تمد-داعى تەڭدەسى جوق عيمارات – وقۋشىلار سارايىندا ءوتتى. شاراعا پارلامەنت جانە ءماسليحات دەپۋتاتتارى, ءبىلىم جانە عىلىم مينيسترلىگى وكىلدەرى, ۇزدىك وقۋشىلاردىڭ ۇستازدارى دا شاقىرىلدى.
استانا قالاسىنىڭ تالانتتى وقۋشىلارىن انىقتاۋ جانە قولداۋ ماقساتىندا ۇيىمداستىرىلىپ تۇراتىن مۇنداي بالدىڭ وزىندىك ءداستۇرى بار. سوعان ساي, ەر بالالار سموكينگ نەمەسە قارا ءتۇستى كلاسسيكالىق كوستيۋم, اق جەيدە كيىپ, قارا ءتۇستى ەلبەلەك تاعىپ كەلسە, قىز بالالار اق ءتۇستى بال كويلەگى مەن اق تۋفلي كيدى. ۇلكەن ءومىر الدىندا جۇزدەرى بالبۇل جانعان جاستارعا استانا قالاسى ءبىلىم باسقارماسىنىڭ باستىعى ءاسيما بيمەندينا ءسوز سويلەپ, ىزگى تىلەگىن جەتكىزدى.
باسقارما باستىعىنىڭ ايتۋىنشا, ەلوردامىزدا مەكتەپ قابىرعاسىندا ءجۇرىپ-اق بيىك بەلەستى باعىندىرعان جاستار از ەمەس. ايتالىق, بيىلعى جىلى مەكتەپ بىتىرۋشىلەر ىشىنەن رەسپۋبليكالىق وليمپيادالار مەن عىلىمي سايىستار قورىتىندىسى بويىنشا, ەلوردالىق كوماندا 95 جۇلدەلى ورىندى يەلەنسە, بۇل جالپىكوماندالىق ەسەپتە ءبىرىنشى ورىن ەكەن. استانالىق مەكتەپ وقۋشىلارىنىڭ قورجىنىندا وليمپيادالاردان 7 التىن جۇلدە مەن رەسپۋبليكالىق عىلىمي سايىستاردان تاعى ءبىر التىن بار. كوركەمونەر سالاسى بويىنشا دا, حالىقارالىق دەڭگەيدە باعى جانىپ, استانالىقتاردىڭ اتىن وزدىرعاندار از ەمەس. اتاپ ايتقاندا, برازيليا, كورەيا, قىتاي, رەسەي, تۇركيا, رۋمىنيا, ءۇندىستان, گرۋزيا, كيپر جانە باسقا دا ەلدەردەن استانالىق وقۋشىلار 92 جۇلدە الىپ كەلىپتى.
حوش. 2012 جىلدىڭ سوڭعى قوڭىراۋىن قالانىڭ ءبىلىم بەرۋ مەكەمەلەرى وسىلاي ۇلكەن جەتىستىكتەرمەن اتقارىپ سالدى. ۇستازدار قاۋىمى مەن شاكىرتتەردىڭ وسى جەتىستىكتەرىمەن پارلامەنت ءماجىلىسىنىڭ دەپۋتاتى ۆلاديمير رەدكوكاشين دە قۇتتىقتادى.
«تريۋمف» بالى كەزىندە ەرەكشە كوزگە ءتۇسىپ جۇرگەن سەگىز التىن جۇلدەگەرگە قالا اكىمى اتىنان سىيلىقتار تابىس ەتىلدى. ال, ولارعا ءتالىم بەرگەن ۇستازدار ءبىلىم جانە عىلىم مينيسترلىگىنىڭ ماراپاتتارىنا يە بولدى.
ءنازيرا سايلاۋقىزى
P.S.
ورىس تىلىندەگى «مەكتەپ ءۆالسى» انىنە بيلەگەن تۇلەكتەر «ۇستازىم» ءانىن تىڭداپ, بۇرىنعىلارشا جاپپاي كوز جاسىنا ەرىك بەرگەن جوق. بىراق, سوندا دا ءار-ءار جەردەن ۇستازىن قاپسىرا قۇشاقتاپ, قيماستىقپەن جىلاعان قىز- جىگىتتەردى كوزىمىز شالدى.
تۇلەكتەردىڭ الابۇرتقان سەزىمى سەكىلدى استانانىڭ دا اسپانى تۇنجىراپ تۇرعان بولاتىن…
