استانادا 21 ماۋسىم كۇنى ش.قۇدايبەردىۇلى داڭعىلى, 18 ا مەكەنجايىندا ورنالاسقان «ارمادا» ساۋدا ۇيىندە بوس جۇمىس ورىندار جارمەڭكەسى وتەدى. جارمەڭكەدە 30-دان اسا مەكەمە بوس ۆاكانسيالارىن ۇسىنباقشى.
جالپى, استانا قالاسى اكىمدىگى جۇمىسپەن قامتۋ ورتالىعى بيىل 12 بوس جۇمىس ورىندار جارمەڭكەسىن ۇيىمداستىرۋدى جوسپارلاعان. جىل باسىنان بەرى ونىڭ بەسەۋى وتكىزىلىپ, 175 ازامات تۇراقتى جۇمىسقا ورنالاستىرىلعان ەكەن. حالىقتى ەڭبەكپەن قامتۋعا باعىتتالعان الداعى شارا ساعات 10:00-دەن 13:00-گە دەيىن جالعاسادى.
ايتا كەتەيىك, جۇمىسپەن قامتۋ ورتالىعىنا بيىل 5 748 ادام بوس جۇمىس ورنىن ىزدەپ كەلدى. ونىڭ 2 858-ءى جۇمىسقا تۇرعىزىلدى. 998 ازامات قوعامدىق جۇمىستارعا جىبەرىلىپ, 411-ءى كاسىبي وقىتۋ, قايتا دايارلاۋ جانە بىلىكتىلىگىن ارتتىرۋ كۋرستارىنا باعىتتالدى. «جاستار تاجىريبەسىنە» 254 ادام كىرىسكەن بولسا, الەۋمەتتىك جۇمىستارمەن 100 ادام قامتىلدى.
ءمادينا جاقىپ
