باس قالادا جاستارعا جالعا بەرىلەتىن باسپاناعا العاشقى كۇنى 1300-دەن استام ءوتىنىش كەلىپ ءتۇستى. ءوتىنىش بەرۋ جالعاسۋدا.
ءوتىنىش بەرۋ ءۇشىن ەلەكتروندى تسيفرلىق قولتاڭبا قاجەت, ويتكەنى وتىنىمدەر تەك ونلاين تارتىپپەن qatysu.zhilfond.kz پورتالى ارقىلى قابىلدانادى.
ءوتىنىش بەرۋشىلەر بارلىق قۇجاتتار مەن انىقتامالاردى سكانەرلەپ, ءبىر فايلمەن تىركەۋى كەرەك. ءوتىنىش بەرگەننەن كەيىن ءوتىنىش بەرۋشىلەر ءوز مارتەبەسى تۋرالى SMS حابارلاما الادى. ەگەر ءوتىنىش بەرۋشى باعدارلامانىڭ شارتتارىنا سايكەس كەلسە جانە قۇجاتتاردى تولىعىمەن ۇسىنسا, وندا ءوتىنىشى قابىلدانادى.
باعدارلاما بويىنشا 350 پاتەر بەرىلەدى, پاتەرلەر قورداي – قوشقارباەۆ داڭعىلدارىنىڭ قيىلىسىندا جانە ابىلاي حان مەن مومىشۇلى داڭعىلدارىنىڭ قيىلىسىندا ورنالاسقان. تۇرعىن ءۇيدىڭ اۋدانى 31-دەن 47 شارشى مەترگە دەيىن. اي سايىنعى جالداۋ قۇنى 5000-نان 15000 تەڭگەگە دەيىن بولادى. ىرىكتەۋ وتباسى مۇشەلەرىنىڭ سانىنا قاراي جۇرگىزىلەدى. ياعني وتباسىنداعى ادام سانىنا قاراي ۇلكەندەۋ پاتەر بەرىلەدى. ءوتىنىش بەرۋشىلەردىڭ رەسمي كىرىسى 40 اەك نەمەسە سوڭعى التى ايدا 111 120 تەڭگەنى قۇراۋى كەرەك.
ساتىپ الۋ قۇقىعىنسىز جالعا بەرىلەتىن تۇرعىن ءۇيدى الۋشىلاردىڭ تىزىمدەرى zhilfond.kz سايتىندا جاريالانادى.
قۇجاتتار ءتىزىمى:
– ءوتىنىش بەرۋشىنىڭ جانە وتباسى مۇشەلەرىنىڭ كۋالىكتەرى;
– ديپلومنىڭ سكانەرلەنگەن كوشىرمەسى;
– نەكە قيۋ تۋرالى كۋالىگى;
– بالالاردىڭ تۋ تۋرالى كۋالىگى;
– قازاقستاندا ءسىزدىڭ, جۇبايىڭىزدىڭ جانە بالالارىڭىزدىڭ اتىندا مۇلىك جوق ەكەنى تۋرالى انىقتاما;
– جۇمىس ورنىنان انىقتاما;
– ەگەر ءسىز مەملەكەتتىك ورگاندا جۇمىس ىستەيتىن بولساڭىز, سول مەكەمەنىڭ بلانكىندە بەرىلگەن انىقتاما بولۋ كەرەك;
– ەڭبەك قىزمەتىنىڭ بۇكىل ۋاقىتى ءۇشىن زەينەتاقى اۋدارىمدارى تۋرالى انىقتاما;
– مەملەكەتتىك كاسىپورىن, مەملەكەتتىك قىزمەتكەرلەردىڭ ءتىزىمىن ۇسىنۋ كەرەك;
– بانكتە شوتتىڭ بار بولۋى جانە سونداعى اقشانىڭ قالدىعى مەن قوزعالىسى تۋرالى انىقتاما كەرەك;
– ءوتىنىش بەرۋشىنىڭ جەتىستىكتەرى بار بولعان جاعدايدا وندا جەتىستىكتەرى جايلى گراموتا, سەرتيفيكات ت.ب. سالۋعا بولادى;
– ەگەر ءسىز سوڭعى التى ايدا دەمالىستا نەمەسە اۋىرىپ قالعان بولساڭىز, سول تۋرالى انىقتاما كەرەك;
سونىمەن قاتار بۇعان دەيىن توتەنشە جاعداي جانە كارانتين رەجيمى كەزىندە ءوتىنىش بەرۋشىلەردىڭ تابىسى ازايىپ, 42 500 تەڭگە العان بولسا, بۇل ماسەلەنىڭ ەسكەرىلەتىنى حابارلانعان ەدى. ول ءۇشىن وسى جاردەماقى ەسەپتەلگەن كارتانىڭ شوتىنان ءۇزىندى-كوشىرمەنى ۇسىنۋ قاجەت.
ىرىكتەۋ بالدىق جۇيەگە نەگىزدەلەدى. ۇپايلار وتباسى, بالالارى, جەكە كاسىپتەرى, مەملەكەتتىك قىزمەتتە نەمەسە بيۋدجەتتىك ۇيىمدا جۇمىس ىستەگەنى ءۇشىن بەرىلەدى. سەرتيفيكاتتار, ماراپاتتار سەكىلدى جەكە جەتىستىكتەر دە ەسكەرىلەدى.
2019 جىلدان باستاپ ەلباسىنىڭ تاپسىرماسىمەن جاستاردى قولداۋ ماقساتىندا نۇر-سۇلتاندا 29 جاسقا دەيىنگى جۇمىس ىستەيتىن جاستارعا 5 جىلعا جالعا پاتەر بەرىلەدى. ولار وسى ۋاقىتتا ءوز ءۇيى ءۇشىن اقشا جيناۋ كەرەك.
