قازاقستان ۇلتتىق قۇراماسى 2018 جىلعى الەم چەمپيوناتىنا ىرىكتەۋ كەزەڭىن اياقتادى. سوڭعى تۋردا «استانا ارەنا» ستاديونىندا ارمەنيا كومانداسىن قابىلداپ, 1:1 ەسەبىمەن تەڭ تارقاستى.
توپتان شىعۋعا ەش مۇمكىندىگى جوق قوس كوماندانىڭ بۇل ويىنى جولداستىق كەزدەسۋ سەكىلدى دەسەك تە بولادى. ايتكەنمەن ءبىزدىڭ وتانداستارىمىز ءوز الاڭىندا قالاي دا ءبىر مارتە بولسىن جەڭىسكە جەتىپ, جانكۇيەرلەرىن قۋانتۋعا تىرىسىپ-اق باقتى. ويتكەنى ۇلتتىق قۇرامانىڭ قورجىنىندا وسىعان دەيىن ءبىر دە ءبىر جەڭىس تىركەلمەدى. ارمياندار دا قاراپ قالماي, جەڭىسكە بارىنشا ۇمتىلدى. سەبەبى ولارعا دا ءوز جەرىندە پولشا قۇراماسىنان ويسىراي ۇتىلعاننان كەيىن جۇبانىش جەڭىس قاجەت-اق ەدى.
الەكساندر بوروديۋك باپتايتىن كوماندا ويىن باستالعاننان جەڭىستەن دامەلى ەكەندەرىن بايقاتىپ, العا ۇمتىلدى. بىراق قارسىلاس قاقپاسى سىر بەرمەدى. ەسەسىنە «مانچەستەر يۋنايتەدتە» تەگىن جۇرمەگەن گەنريح محيتاريان قاقپاشىمەن بەتپە-بەت كەلگەندە دوپتى باسىنان اسىرا سالىپ, شەبەرلىگىن تانىتتى. 26-مينۋتتا سوعىلعان بۇل گولعا وتانداستارىمىز 61-مينۋتتا جاۋاپ قاتتى. مۇرتازاەۆتىڭ اۋەلەتكەن دوبىن باسپەن ءدال باعىتتاعان باۋىرجان تۇرىسبەكتىڭ جۇلدىزى جاندى. ول ۇلتتىق قۇراما ساپىندا ءۇشىنشى ويىنىن وتكىزىپ, ەكى رەت ەرەكشەلەندى.
سونىمەن, ەسەپ ودان ءارى ەسەلەنبەي, ناتيجە تەڭ اياقتالدى. ال توپتاعى جالپى ناتيجەدە ارمياندار – بىزدەن ءبىر ساتى جوعارى. جالپى ىرىكتەۋ كەزەڭىن 3 تەڭ جانە 7 جەڭىسپەن قورىتىندىلادىق. سولاردىڭ ىشىنەن ەڭ جارقىن ويىن دەپ ءبىرىنشى تۋردا پولشامەن كەزدەسۋدى ايتۋعا بولادى. توپتىڭ ءفاۆوريتى سانالعان بۇل كومانداعا ايبات كورسەتىپ, تەڭ تۇسكەن قۇرامامىزدان ودان ءارى اجەپتاۋىر ناتيجە كۇتىپ, ۇمىتتەنىپ قالعان ەدىك. بىراق سوڭىندا ىرگەمىزدەگى رەسەيدە وتەتىن الەم چەمپيوناتى تىم الىستاپ كەتتى. وسىلايشا, الىس تا جاقىن الەم چەمپيوناتىمەن تىم ەرتە قوشتاستىق.
ورىنبەك وتەمۇرات
