ريوداعى حV پاراليمپيادالىق ويىنداردا ەل نامىسىن قورعاعان سپورتشىلار كەشە استاناداعى №65 مەكتەپ-گيمنازيا وقۋشىلارىن بۇكىلالەمدىك كۇلكى كۇنىمەن قۇتتىقتاپ, «جۇرەكتەن جۇرەككە» اتتى مەرەكەلىك كونتسەرتتە قاتاردان قالماعان قامكوڭىل بالالاردىڭ ونەرىن تاماشالاپ قايتتى.
قالامىزداعى كوررەكتسيالىق-تۇزەتۋ سىنىپتارى 2010 جىلى №65 مەكتەپ-گيمنازياسىنا كوشىرىلگەن بولاتىن. ال كەلەسى جىلى مەكتەپكە ينكليۋزيۆتى وقۋ ساتىسى ەنگىزىلدى. ياعني, بالالار جىنىسىنا, جاس ەرەكشەلىگىنە, قيمىل-قوزعالىسى مەن اقىل-ەسىندەگى اۋىتقۋشىلىققا, الەۋمەتتىك جاعدايىنا قاراماستان, ساپالى ءبىلىم الۋعا مۇمكىندىك الدى. قازىرگى تاڭدا اتالمىش مەكتەپ گيمنازيادا ەرەكشە قاجەتتىلىكتەرى بار 81 بالا مەن قۇلاعى ناشار ەستيتىن 203 وقۋشى وقيدى ەكەن.
مۇمكىندىگى شەكتەۋلى بالالار ساباقتان بولەك, ءان, بي, سۋرەت سالۋ سەكىلدى ءتۇرلى ۇيىرمەلەرگە قاتىسادى. بۇل جۇمىستاردىڭ ناتيجەسى ساحنادان ايقىن كورىندى. قۇلاق كەمىستىگى بار بۇلدىرشىندەر مۋزىكا ىرعاعىن ءدال سەزىنىپ, «كالينكا» بيىمەن كوپشىلىكتىڭ تاڭدايىن قاقتىرسا, سال اۋرۋىنا شالدىققان بالالار جاندى داۋىستا ءان ايتىپ, مانەرلەپ ولەڭ وقىدى.
ءىس-شارا بارىسىندا جارىمجان جاندار حالىقتى مەيىرىمدىلىككە, جاقىندارىمىزعا جاقسىلىق سىيلاۋعا شاقىردى. «ءبىز – بەيبىت زاماننىڭ جاس ۇرپاعىمىز. ءبىر-ءبىرىمىزدى رەنجىتپەي, ەشكىمدى جىلاتپاي, مەيىرىمگە ساراڭ بولماي ءومىر سۇرسەك, سوعىسسىز الەمدى جارقىن جاققا وزگەرتەر ەدىك» دەيدى 4-سىنىپ وقۋشىسى حاليد حارسيەۆ.
سونداي-اق, كونتسەرتتە «اناشىم» ءانىن ورىنداعان باستاۋىش سىنىپ وقۋشىسى ءمولدىر سابيتبەكتى ەلىمىزگە تانىمال تەلەجۇرگىزۋشى دينارا ساتجان قۇتتىقتاپ كەلدى. ول تۋعاننان قاتال تاعدىر سىنىنا تاپ بولعان بالالاردى باسقالاردان وقشاۋلاماي, قوعامنان شەتتەتپەي, ساپالى ءبىلىم بەرىپ, ومىرگە بەيىمدەپ جاتقان مەكتەپ ۇستازدارىنا العىسىن ءبىلدىردى.
ءمادينا جاقىپ
