«Astana LRT» كومپانياسى نوسەر كەزىندە كوشەگە جينالىپ قالعان تەرەڭ سۋدان قوعامدىق كولىكپەن وتكەن جۇرگىزۋشىنى جۇمىستان شەتتەتۋ سەبەبىن ءتۇسىندىردى.
مامانداردىڭ ايتۋىنشا, نوسەر جاۋعان كۇنى استاناداعى مومىشۇلى داڭعىلى مەن توقپانوۆ, سارايشىق كوشەلەرىندەگى جانە باسقا دا بىرقاتار اۆتوبۋس باعدارلارى وزگەرتىلگەن. ول تۋرالى جۇرگىزۋشىلەر قۇرامىنا دا شۇعىل حابار بەرىلگەن.
«20 تامىز كۇنى قولايسىز اۋا رايى كەزىندە قالالىق بيلىك قاۋىپسىزدىكتى قامتاماسىز ەتۋ ءۇشىن بىرقاتار شارالار قولداندى. الايدا بارلىق تۇرعىندار بۇل ەرەجەنى ۇستانعان جوق. وسىعان وراي «استانا LRT» كومپانياسى سۋ باسقان كوشەمەن ءجۇرىپ, اۆتوبۋس سالونىن سۋعا تولتىرعان قوعامدىق كولىك جۇرگىزۋشىسىن جۇمىستان شەتتەتتى. جۇرگىزۋشىنىڭ بۇل ارەكەتى جولاۋشىلاردىڭ ءومىرى مەن قاۋىپسىزدىگىنە قاتەر ءتوندىرىپ, اۆتوبۋستىڭ بۇلىنۋىنە اكەپ سوعار ەدى. رولگە وتىرعان ءار جۇرگىزۋشى جولاۋشىلاردىڭ قاۋىپسىزدىگىنە جاۋاپتى. ماسەلەن, جاۋىن-شاشىن كەزىندە جولدى كورۋ مۇمكىندىگى ناشارلايدى. ونىڭ ۇستىنە, كولشىك سۋدىڭ استىندا شۇڭقىرلار بولۋى مۇمكىن. بۇل جاعدايدا جۇرگىزۋشى تاسىمالداۋ مەن قاۋىپسىزدىك ەرەجەلەرىنە, پوليتسيا نۇسقاۋىنا قاراماستان جولاۋشىلاردىڭ ءومىرىن قاتەرگە تىگىپ, قولايسىزدىق تۋعىزدى. بەينەجازبالارعا قاراپ, جۇرگىزۋشى ارەكەتىنە جولاۋشىلاردىڭ نارازى بولعانىن, ءتىپتى قورىققانىن كورۋگە بولادى» دەيدى ماماندار.
جۇرگىزۋشى كولىك تىزگىنىنەن ۋاقىتشا شەتتەتىلگەنمەن, ازىرگە جۇمىستان بوساتىلعان جوق. قازىرگى ۋاقىتتا قىزمەتتىك تەكسەرۋ جۇمىستارى جۇرگىزىلۋدە. الداعى ۋاقىتتا سونىڭ ناتيجەسىنە قاراي ناقتى شەشىم قابىلدانباق.
