Сенатор Мұрат Бақтиярұлы саяси қуғын-сүргіндердің қасіретіне және ашаршылық құрбандарына Үкімет деңгейінде ресми құқықтық баға беретін шешім шығару қажеттігін мәлімдеді.
Халықшыл депутат ашаршылықтың құрбаны болған отандастарымыздың ортақ тізімін жасап, ғылыми-зерттеу орталығын құруды ұсынды. Оның пайымдауынша, зобалаң жылдардың қайғы-қасіреті мен салдарын әлі де кеңінен айтып, БАҚ-тар мен кино арқылы жас ұрпақтың санасына сіңіру – бәріміздің міндетіміз.
Ол 1930-33 жылдары атақонысында тұратын қазақ халқы тең жартысынан айырылғанына, мұндай аса ауыр қасіретті бірде-бір халық бастан өткермегеніне тоқталды. Алапат зұлмат қазақ ұлтының өсімін кем дегенде 100 жылға кейін шегеріп тастағанын тілге тиек етті. «Айта кетерлігі, мұндай ашаршылық Қазақстанда тұратын басқа ұлттарға да қасірет әкелді. Мысалы, қазақстандық ұйғырлардың 13 пайызы, украиндар мен немістердің 11 пайызы, татарлардың 10 пайызы, өзбектердің 8 пайызы, орыстардың 6 пайызы ашаршылыққа ұшырады. Қазір демограф мамандар қолдан жасалған осы ашаршылық болмаса, қазіргі кезде біздің халқымыздың саны 45 миллионға жетуі мүмкін екенін дәлелдеп жүр» деді депутат Үкімет басшысы Бақытжан Сағынтаевтың атына жолдаған сауалында. Депутат ашаршылық тарихы мен оның зардабын өзге бір халықтан кек алу үшін саяси ойын құралына айналдыруға болмайды деп санайды.
