Соңғы күндері әлем жұрты елеңдескен елеулі оқиғалардың бірі Ресей сыртқы істер министрі Сергей Лавровтың 31 мамырда тоғыз жылдық үзілістен кейін КХДР-ға ресми сапармен барғаны болды. Сарапшылар сонымен бірге оның Ким Чен Ын билік басына келгелі бері қабылдаған ресейлік бірінші мемлекет қайраткері екенін де айтып жатыр. Ал көрші ел сыртқы байланыс ведомствосы басшының Солтүстік Корея мен АҚШ саммиті қарсаңында Пхеньянға неге барғанын, мұндағы келіссөздің нендей тақырыпқа арналғанын болжау қиын емес.
МАЛАЙЗИЯ САРАПТАМАҒА СЕНГЕН ЖОҚ
Малайзия көлік министрі Энтони Лок өз елінің «Боинг» жолаушылар ұшағының апатына байланысты Ресейге таңылып отырған айыптауды дәлелсіз деп мәлімдеді.
Бұдан бұрын халықаралық тергеушілер тобы тергеу арасындағы кей тұжырымдарға сүйене келіп, аталмыш лайнерді Ресейдің Курскідегі 53-інші зенит-ракеталық бригадасына қарасты «Бук» кешені атып түсірген деген пікір білдірген болатын. Бірақ Ресей қорғаныс министрлігіндегілер сол бойда мұның шындыққа жанаспайтынын айтты. Мәскеу сондай-ақ тергеудің Ресей жағы келтіріп отырған уәж бен куәлардың айтқандарын қаперге алып отырмағанын сынады.
Оқиға 2014 жылдың шілдесінде болды. Амстердамнан Куала-Лумпурға қарай MH370 рейсі бойынша ұшып бара жатқан Boeing 777-200 әуе кемесі Донецк облысы үстінде атып түсірілді. Сол сәтте ұшақтың бортында 298 адам бар еді. «Алмаз-Антей» әуе шабуылына қарсы жүйесін жасаушы кәсіпорынның сарапшылары оның украин әскерлері атқан зеңбіректің оғынан құлағанын білдірді.
«ӨЛДІ ДЕГЕН БАТЫРЫҢ ӨГІЗ МІНІП КЕЛЕДІ»
Украинада қызмет ететін ресейлік журналист Аркадий Бабченконың «атып өлтірілгені» жалған ақпар болып шықты.
Мұның алдында үйінде отырған журналисті пәтеріне басып кірген бейтаныс біреулердің ту сыртынан келіп атқаны, оның жедел жәрдем көлігімен ауруханаға апарыла жатқан жолда жан тәсілім еткені хабарланған еді. Бірақ артынша ұлттық полиция мәлімдегендей, «өлді деген батырың» тірі болып шықты.
Бабченконың өзі Украина қауіпсіздік қызметінде өткен баспасөз мәслихатында болған жайды айтып берді. Сөйтсе, операцияны осы орган жүргізген екен. Ол мұны журналистке жасалғалы жатқан қастандықтың алдын алып, оны орындаушыны іс үстінде қолға түсіру үшін ұйымдастырыпты.
Алайда украин қауіпсіздік қызметінің бұл бопсалау әрекетін әлемнің көптеген жетекші ақпарат құралдары, соның ішінде АҚШ пен Британияның телеарналары мен басылымдары қатты сынады.
МЕКСИКА ҚОРҒАНҒА АҚЫ ТӨЛЕМЕЙДІ
Мексика президенті Энрике Пенья Ньето АҚШ-тың екі ел шекарасында тұрғызып жатқан қабырға-қорғанның құрылысы үшін бір тиын да төлемейтінін айтты.
Мұны ол өзінің Twitter әлеуметтік желісінде жазды. «Президент Дональд Трамп. Жоқ. Мексика қабырға үшін ешқашан ештеңе төлемейді. Қазір де, кейін де. Құрметпен, Мексика (біз бәріміз)» делінген хабарламада.
Әңгіме АҚШ президенті Дональд Трамптың 29 мамыр күні өзі жиі пайдаланатын желіде Мексика билігінің Штаттарға жасырын жолмен өтуге талпынушылар тасқынын тоқтатуға көмектеспейтініне наразылық танытуынан туып отыр. Ол өз жазбасында Мексиканы шекарадағы қорған құрылысына ақша беруге мәжбүр ететінін баяндаған еді.
