Ертең елімізде спорт күні аталып өтіледі. Осы мереке қарсаңында Астана қаласының әкімдігі елордалық спортшы қауымына құрмет көрсетті. Салтанатты жиын барысында елорда әкімінің орынбасары Ермек Аманшаев астаналық спортшылардың, бапкерлердің, мамандардың еңбегіне баға беріп, бірқатар азаматтарға арнайы төсбелгілер табыс етті.
Спорт саласы қызметкерлерін құрметтеу шарасында Астана қаласы Мәдениет және спорт басқармасының басшысы Болат Мажағұлов та елордалық спортшы мамандарды төл мерекелерімен құттықтап, қала тұрғындарының бұқаралық спортпен айналысуына елеулі еңбек сіңіріп жүрген мамандарға, жаттықтырушылар қауымына, елдің абыройы үшін сынға түсіп жүрген спортшыларға табыс тіледі. «Сіздердің жетістіктеріңіз елордамыздың мерейін өсіреді. Астана спортшыларының республикалық және халықаралық жарыстардағы жеңістері шын мәнінде мақтануға тұрады. Алдағы уақытта да астаналық мәртебеге сай биік тұғырлардан көріне берулеріңе тілектеспіз» деді басқарма басшысы.
Салтанатты жиын соңында бір топ спорт ардагерлеріне, спортшыларға, мекеме басшыларына, бапкерлер мен кәсіби мамандарға «Сергектік пен денсаулық» және «Шынығуды жетілдіру» төсбелгілері, «Алғыс хат» салтанатты жағдайда табыс етілді. Мерейі өскендер арасында Николай Дрютов, Самат Қабдулин, Азамат Иманбаев, Айдын Тоқбаев, Қуат Тілегенов, Азамат Имашев, Ирина Щетинина, Азамат Хамзин, Анастасия Бибикова және басқа да елорда спортын дамытуға үлкен үлес қосып жүрген мамандар болды.
– Спортшылар қауымының еңбегін бағалап, осындай құрмет білдіріп отырған Астана қаласының әкімдігіне алғыс айтқым келеді. Ауыз толтырып айтатын жетістіктеріміз жетеді. Алдағы уақытта елорда спортын дамытуға байланысты көптеген жұмыстар атқарылуы керек. Осы орайда әріптестеріме жемісті еңбек, жеңісті сәттер тілеймін, – деді Қазақстанның еңбек сіңірген жаттықтырушысы, спорт ардагері Николай Дрютов.
