Бокстан жастар арасында Таиландтың астанасы – Бангкок қаласында өткен Азия чемпионатында Қазақстанның жігіттер және қыздар құрамалары 10 алтын медаль жеңіп алып, айды аспаннан бір-ақ шығарды. Сөйтіп, екі ұжым да командалық есепте бірінші орынды жеңіп алды.
Сәуірдің 21-27-сі аралығында шаршы алаңды шайқаған шайқастарда Ғалымбек Кенжебаевтың
ұландары 6 алтын, 1 күміс және 1 қола медальді қоржынға салды. Қоржынында 3 алтын, 2 күміс және 2 қола медалі бар таиландтықтар екінші болса, 1 алтын, 4 күміс және 2 қола медаль алған өзбек боксшылары үшінші орынға орналасты.
Бізден Азия чемпионы деген атаққа Махмуд Сабырхан (49 кг), Талғат Шәйкенов (64 кг), Ермахан Жақпеков (69 кг), Сағындық Тоғамбаев (81 кг), Айбек Оралбай (91 кг), Дамир Тойбай (+91 кг) қол жеткізді. Ал күміс медаль Нұрбек Оралбайдың (75 кг), қола жүлде Бейбарыс Жексеннің (56 кг) еншілеріне жазылды.
Алмас Қуатбек жаттықтыратын қыздар командасы түгел жүлделі орындардан көрінді. Олар 4 алтын, 3 күміс және 3 қола медальді қанжығаға байлады. Екінші орынға үнді қыздары көтерілсе, үшінші орынға тай бойжеткендері жайғасты.
Жерлестерімізден Жансая Әбдірайымова (51 кг), Надя Рябец (75 кг), Гузалия Садықова (81 кг), Дина Исламбекова (+81 кг) құрлық чемпиондары атанды. Күміс медаль Айзада Исламғали (54 кг), Еркежан Дәулетқызы (57 кг), Майя Бейсебаева (69 кг) сынды қыздарымызға бұйырды. Қола медальді Әнел Құдайберген (48 кг), Мария Гладкова (60 кг), Жұлдыз Тойкова (64 кг) мойындарына орады.
Енді осында жүлдегер атанған спортшылардың бәрі алдағы тамызда Венгрияда жалау көтеретін жастар арасындағы әлем біріншілігіне қатысады.
Дамир ҚОЖАМҚҰЛ
