Кеше Астана қаласының «Ауғанстан соғысы мүгедектері мен ардагерлері одағы» қоғамдық бірлестігі балаларға арналған жаңажылдық шырша тойын ұйымдастырды.
«Азия парк» сауда-ойын-сауық орталығында өткен мерекелік шараға Ауғанстан соғысына қатысқан жауынгер-интернационалистердің балалары мен немерелері шақырылды. Аяз ата мен Ақшақардың ақ тілегіне қуанған балалар өз өнерлерін де ортаға салды.
– Балалар үшін жаңажылдық ертеңгілік өткізуді дәстүрге айналдырып келеміз. Осылайша, соғыс көрген замандастарымыздың балалары мен немерелерін бір қуантып, сыйлық береміз. Бұл да бір патриоттық тәрбиенің, әлеуметтік қолдаудың үлгісі деп ойлаймын. Бүгін 200-ге жуық балаға сыйлықтар үлестірдік, – дейді осы шараны ұйымдастырушы, Ауғанстан соғысы мүгедектері мен ардагерлері одағы» ҚБ төрағасы Серік Кенжебеков.
Шара соңында балалар ойын аттракциондарында екі сағат бойы түрлі ойындардың қызығына батып, көтеріңкі көңіл-күймен тарасты.
