Кең мүмкіндіктер әлемі
Елорда Паралимпиадалық жаттығу орталығында «Самұрық-Қазына» АҚ компаниялар тобының қаржылық қолдауымен ерекше қажеттіліктері бар балалар мен олардың ата-аналарына арналған жарыс республикалық бұқаралық ақпарат құралдарының өкілдерінің қатысуымен өтті.
Балалармен бірге бір қатарда тұрып түрлі эстафеталық ойындарды ойнау – орталықтың «Кең мүмкіндіктер әлемі» бағдарламасының ұтқыр бастамасы болды. Ерекше балалар мен олардың ата-аналары қоғамның ашықтығына көз жеткізіп, өздерінің жалғыз еместігін сезінетіндей маңызды спорт мерекесі болды. Көңілді жарыстың алдында сөз алған «Samruk-Kazyna Trust» әлеуметтік жобаларды дамыту қорының бас директоры Альфия Әдиева, компанияның осы бағытта атқарып жатқан жобалары туралы айтып, жарыстың әлеуметтік маңызына тоқталды.
Бүгінде 250-ге жуық ерекше балалар Паралимпиадалық жаттығу орталығында түрлі спорт түрлерімен айналысып, жаттығуларға қатысады. Олардың ортаға бейімделіп, денесін шынықтырып, күнделікті өмірін шуақты етуге мұнда барлық жағдай жасалған.