«Көктал» көріктенеді
Елорда көркінің сұлулығына сән қосатын тағы бір саябақ «Көктал» тұрғын алабы тұрғындарының серуендеп, демалып, спортпен шұғылдануына мүмкіндік беретін болады.
«Нұр-Сұлтан – жайлы қала» жобасы аясында салынып жатқан бұл саябақ үш аймақтан тұрады. Оның ішінде тыныш демалыс аймағы, амфитеатр, футбол, волейбол, баскетбол, теннис, скейтборд және йога алаңдары болады. Саябақ аумағында 8 мың ағаш отырғызу да жоспарланып отыр.
«Тұрғындармен кездесулерде, азаматтарды қабылдау барысында олар саябақтар мен тынымбақтарды абаттандыру мәселесін жиі көтереді. Сондықтан тұрғындар алабын дамытуға көп көңіл бөлеміз. Қазір қалада 4 ірі дене шынықтыру-сауықтыру кешенін салып жатырмыз. Бұл бұқаралық спортты дамытып, жастардың денсаулығын нығайтуға көмектесетін болады. Бұл саябақтар тұрғындардың сүйікті орындарының біріне айналуы үшін жұмысты сапалы орындау қажет. Автоматты суару жүйесін ойластыру керек» деп жазды елорда әкімі Алтай Көлгінов әлеуметтік желідегі парақшасында.