– Basynda būl käsıppen aǧa-jeŋgem özderı ainalysatyn. Keiın menı şaqyrtyp aldy. Öitkenı satatyn närselerımızdıŋ köbı öz qolymyzdan şyqqan. Onyŋ jasaudyŋ özıne köp uaqyt, küş-jıger ketedı. Sondai-aq keibıreulerın qolönermen ainalysatyn şeberlerge tapsyrys berıp aldyramyz. Onyŋ bärıne jürıp-tūratyn adam kerek. Ärine, käsıptıŋ oŋaiy joq. Bıraq bız osynyŋ arqasynda otbasymyzdy asyrap, künımızdı körıp otyrmyz. Tabysymyz jaman emes, sauda toqtap tūrǧan joq, – deidı 25 jastaǧy jıgıt.
Nauryzǧalidyŋ mamandyǧy temırjolşy, bıraq jastaiynan ūlttyq uyzǧa jaryǧan, köne äŋgımelerge kökıregın tüiıp ösken jıgıttıŋ qazaqy saltqa degen qūmarlyǧy erekşe boldy. Qolönerge degen qyzyǧuşylyǧy da sonyŋ äserınen tuyndaǧan siiaqty. Onyŋ üstıne tuǧan aǧasy Däulet osy käsıppen käsıbi türde ainalysady. Jastaiynan közı körgenı – qolöner. Köp närsenı sodan üirendı. Qolönerdı arnaiy oqyǧan joq, bärı közımen körıp, kökıregıne tüigenderı. Sosyn şyn talaptanǧan adamǧa alynbaityn qamal bar ma?! Ärine, basynda qatelestı, qiiuy kelmei jatqan kezderı boldy, bıraq bärı bırte-bırte qalpyna kele berdı. Kün ötken saiyn şeberlıgın şyŋdai tüstı.
Şaǧyn şeberhanalarynda saudaǧa şyǧaratyn närselerdıŋ köpşılıgın aǧa-jeŋgesı jäne özı jasaidy. Asyl tastardan jäne baǧaly metaldardan monşaq, şolpy, alqa, syrǧa, saqina, bılezık, taspiyq daiyndaidy. Aǧaştan oiu oiyp, temırden tüiın tüiedı. Müiızden Taza qaiystan qamşy öredı. Äigerım jeŋgesınıŋ qolynan üi şaruaşylyǧyna qajettı būiymdar, kestelı bet oramaldar şyqqan.
Qala äkımdıgı qolönerşılerge sauda ornyn äleumettık joba retınde tegın bergen. Tek paidalanǧan elektr jaryǧyna ǧana aqy töleidı. Bıraq qazır künnıŋ ūzaqtyǧyna bailanysty olar jaryqty paidalanbaidy dese de bolady. Sondyqtan tüsken kırıstı tügeldei şikızat materialdaryn aluǧa, kündelıktı tūrmystyq qajettılıkterıne jaratady. Odan artylyp jatsa, erteŋge qor jinap qoiudy da ūmytpaidy.
Zattardyŋ baǧasy da qymbat emes: 500 teŋgeden bastalady. Bıraq qaltaly adamdarǧa arnalǧan qymbattary da bar. Kürdelı örnektelgen, jasaluy qiyn ärı bırşama köp uaqyt ketetın naqyştalǧan eŋ qymbat saqinalar 120 000 teŋgege deiın barady. Olar altynmen aptalyp, kümıspen küptelıp, asyl tastarmen bezendırıledı. Degenmen ondai bıregei zattar arnaiy tapsyryspen jasalady. Ädette saqina 1 aptanyŋ kölemınde jasalsa. Qūny 50-60 myŋ tūratyn asyl tas pen taza kümısten qūiylǧan alqa, qūsmūryn jüzık jäne bılezıkten tūratyn qyz-kelınşekterge arnalǧan jiyntyq jasauǧa 2 aptadai uaqyt ketedı.
Būiymdardy, negızınen, elordaǧa qydyryp kelgender estelık retınde satyp alady. Ūlttyq būiymdarǧa, äsırese, şeteldıkterdıŋ qyzyǧuşylyǧy küştı. Är zattyŋ qūnyn bıletın şeteldıkter qolönerdı joǧary baǧalaidy. Bır quanarlyǧy, taza tabiǧi būiymdar men asyl tastardan, baǧaly metaldardan jasalǧan ūlttyq qolönerge degen sūranys jaqsy.
