Aula klubtary kımge qaraidy?

Nūr-Sūltan qalasy mäslihatynyŋ zaŋdylyq, qūqyqtyq tärtıp jäne qoǧammen jūmys mäselelerı jönındegı tūraqty komissiiasynyŋ otyrysynda elordadaǧy aula klubtaryn damytu tūjyrymdamasy jobasy talqylandy. Bügıngı taŋda qalada 21 aula kluby jūmys ısteidı. Mūndaǧy üiırmelerge 3,5 myŋnan asa bala barady. Alaida aula klubtaryna qatysty tüitkıldı mäseleler az emes.

BILIM BASQARMASYNA BERU ŪSYNYLDY

Tūraqty komissiianyŋ otyrysynda qaladaǧy aula klubtaryn damytu tūjyrymdamasy jobasy boiynşa atqarylyp jatqan jūmystar turaly Nūr-Sūltan qalasy Qoǧamdyq damu ısterı basqarmasy basşysynyŋ orynbasary Jüsıp Jūmaǧūlov baiandap berdı.
Qazırgı kezde qaladaǧy aula klubtaryndaǧy tärbie­lenuşılerınıŋ 98 paiyzy 14 jasqa tolmaǧan. Olar jastar bolyp sanalmaidy. Sonda da, aula klubtary jūmysyn «Astana jastary» jastar resurstyq ortalyǧy ūiymdastyryp otyr. Bılım jäne ǧylym ministrlıgı bekıtken erejege säikes būl jūmys osyndai ortalyqtardyŋ mındetıne kırmeidı. Sondyqtan aula klubtaryn Bılım basqarmasyna berudı, iaǧni orta mektepterdıŋ janynan ūiymdastyru ūsynyldy.
Būǧan qosa, osy künderı aula klubtary jūmysynda bırqatar problemalar anyqtaldy. Basty mäsele – klubtardyŋ jertölelerde ornalasyp, tiıstı sanitarlyq-epidemiologiialyq talaptarǧa jauap bermeitındıgınde bolyp otyr. Üiırme jetekşılerınıŋ jalaqysy da tömen. Aula klubtaryn audandarǧa bölude tepe-teŋdık te saqtalmaǧan. Mäselen, Esıl audanynda üş klub qana aşylǧan. Al ata-analardyŋ tarapynan osyndai klubtardy aşu ötınışterı köptep tüsıp jatyr.

MEKTEPTERDIŊ MÜMKINDIGI JOQ

«Elordanyŋ klimattyq jaǧ­daiy aşyq alaŋdarda sportpen jäne basqa sabaqtarmen ainalysuǧa mümkındık bermeidı. Aula klubtary tapşylyǧyn joiu maq­satynda olardy 2020 jyldyŋ 1 qaŋtarynan bastap orta mektepter men kolledjderdıŋ sport zaldary men saltanattardy ötkızu zaldary bazasynda qūrudy josparlap otyrmyz. Qazır klubtardy ūstaudyŋ bıryŋǧai maqsatyn anyq­tau­y­myz kerek. Jattyqtyruşylar men ūstazdarda bılıktılıkterın däleldeitın qūjat boluy tiıs. Aula klubtary jūmysyna tūraqty türde jauap beretın organdy da belgıleuımız qajet. Osynyŋ bärı köp qarjy salmai-aq qala aumaǧynda aula klubtaryn köbeituge mümkındık beredı» dedı J.Jūmaǧūlov.
Alaida Bılım basqarmasynyŋ būl klubtardy basqaruǧa qūlşynysy joq. Onyŋ da belgılı bır sebepterı bar. Atalmyş basqarma basşysynyŋ mındetın atqaruşy Baǧlan Smataeva qalanyŋ şet aimaqtarynda ornalasqan keibır mektepterde ülken qoǧamdyq ortalyqtar aşylǧanyn aitady.
Ony qalalyq mäslihat deputattary Ramziia Ömırbaeva men Zäure Jüsıpova qostady. Basqa-basqa, osy deputattar orta mektepterdıŋ jaǧdaiyn jaqsy bıledı, ekeuı de – mektep direktorlary. Olardyŋ pıkırınşe, qazırgı jaǧdaida aula klubtaryn mektepterge köşıru mümkın emes. Orta bılım beru oryndarynyŋ tyǧyzdyǧy būǧan mümkındık bermeidı. Alǧaşqysy sonyŋ saldarynan özı basşylyq etetın A.Qūrmanov atyndaǧy №17 mektep-gimnaziia­da inkliuzivtı synyp aşa almai otyrǧanyn aitady. Sport zaldar da keşkı saǧat 7-8-ge deiın bos bolmaidy. Sebebı osy uaqytqa deiın dene şynyqtyru sabaqtary ötedı.
Aula klubtaryn damytu tūjyrymdamasy 2023 jylǧa deiıngı merzımdı qamtidy. Qalalyq mäslihat deputattary atalmyş qūjatty qaita qarap, jetıldıru kerek dep esepteidı. Sondai-aq olar «Kirpichnyi», «Öndırıs», «Şyǧys İlinka» tūrǧyn alaptarynda, basqa da osy siiaqty şet aimaqtarda osyndai klubtardy aşu kerektıgıne nazar audardy.

Baǧlan Smataeva,
Nūr-Sūltan qalasy bılım basqarmasy basşysynyŋ mındetın atqaruşy:

– Qazır barlyq mektepterde şyǧarmaşylyq üiırmeler men sporttyq seksiialar jūmys ıstep jatyr. 16 myŋnan astam bala aqysyz negızde qosymşa bılım alyp jatyr. 7 myŋnan asa jetkınşıkke jeŋıldıkter qarastyrylǧan. Al aula klubtaryna balalar ǧana emes, 29 jasqa deiıngı jastar da barady. 18 jastan asqan adamdardy mektepter qamti almaidy. Onyŋ üstıne qalada üş auysymmen oqytatyn mektepter älı bar. Sondyqtan aula klubtary jūmysyn üilestıruge bızdıŋ şamamyz kelmeidı.

BAS QALA BIýDJETIN TALQYLAU BASTALDY

Qalalyq mäslihattyŋ tūraqty komissiialarynda 2020-2022 jyldarǧa arnalǧan elorda biudjetı jobasyn talqylau bastaldy. Alǧaşqylar retınde qala äkımınıŋ apparaty, Polisiia departamentı, Qoǧamdyq damu ısterı basqarmasy, Tötenşe jaǧdailar departamentı biudjetterı tanystyryldy.
Strategiialyq jäne biudjettık josparlau basqarmasynyŋ basşysy Qaisar Maŋqaraev bas qala biudjetı būrynǧydai äleumettık mäselelerdı şeşuge baǧyttalǧanyn aitady. Oǧan eŋ tömengı künkörıs deŋgeiınıŋ artuy, bılım beru salasyn qarjylandyru jäne ärtürlı jeŋıldıkterge ie azamattardy äleumettık qoldau jūmys­tarynyŋ küşeitıluı dälel.
Baiandamaşy deputattardy osy jyldyŋ 9 aiyndaǧy Nūr-Sūltan qalasynyŋ äleu­mettık-ekonomikalyq damu qorytyndylarymen tanys­tyryp, aldaǧy üş jylǧa arnalǧan elorda biudjetı jobasynyŋ negızgı parametr­lerın ūsyndy.
Biudjet jobasyn talqylau barysynda deputattar barlyq aitylǧan ūsynystar men körsetılgen problemalar nazardan tys qalmai, üş jyldyq biudjettı oryndau barysynda şeşıletınıne senım bıldırdı. Joǧaryda körsetılgen biudjettık baǧdarlamalar äkımşılerı biudjetterınıŋ jobalaryn maqūldady.

«SERGEK» JOBASY TİIMDILIGIN DÄLELDEDI

Elordada IT salasyn damytu jäne qauıpsızdıktı qamtamasyz etu maqsatynda ekı jyldan berı «Sergek» jobasy jüzege asyryluda. Memlekettık jekemenşık ärıptes­tık aiasynda bastalǧan būl joba 13 myŋ beinebaqylau kamerasyn ornatudy jäne bırıktırudı közdeidı. Būǧan qalanyŋ 400 jol qiylysynda jäne 300 jelılık uchaskelerde aqparattyq-baǧdarlamalyq keşenderdı, adamdar köp jinalatyn jerlerde 4 myŋ beinebaqylau kamerasyn ornatyp, özge 3 myŋ osyndai kameramen bır jüiege keltıru jūmystary kıredı. Būl turaly qalalyq mäslihattyŋ köpşılık tyŋdaularynda İnvestisiialar jäne käsıpkerlıktı damytu basqarmasynyŋ basşysy Erlan Bekmyrzaev baiandady.
«Sergek» jobasy ekı kezeŋge bölıngen. Onyŋ bırınşı kezeŋın jüzege asyru ötken jyly aiaqtalyp, beinebaqylau kameralary qalanyŋ kommunaldyq menşıgıne berıldı. Qazır ekınşı kezeŋ jūmystary boiynşa kameralardy ornatu tolyqtai aiaqtaldy. Iаǧni, joba 100 paiyzǧa oryndaldy. Sonyŋ arqasynda elorda joldary elımızdıŋ eŋ qauıpsız joldaryna ainaldy. 2018 jyly 2017 jylmen salystyrǧanda joldaǧy ölım-jıtım ekı esege, 60 ölımnen 34-ke azaidy. Byltyr jol-kölık oqiǧalary 10 paiyzǧa, jolda jaraqattanu taǧy 10 paiyzǧa tömendedı. Osy jyldyŋ 9 aiynda jolda 23 adam qaiǧyly qazaǧa ūşyrady. Būl 100 myŋ adamǧa ekı osyndai jaǧdaidy qūraidy. Respublika boiynşa jolda qaza tabudyŋ ortaşa körsetkışı – 100 myŋ adamǧa 7,2 adam. Almatyda – 5,4 adam jäne Şymkentte – 5,1 adam.
«Sergek» jobasy özınıŋ tiımdılıgın däleldedı» deidı E.Bekmyrzaev.

BEINEBAQYLAU KAMERALARY QYLMYSTARDY AŞUǦA SEPTESTI

Qalalyq Polisiia departamentı bastyǧynyŋ orynbasary Sabyr Jüsıpbekovtıŋ aituynşa, «Sergektıŋ» 6 myŋ kamerasy jol erejelerı saqtaluyn baqylaudy, 7 myŋy qoǧamdyq qauıp­sızdıktı qamtamasyz etudı közdeidı. Būǧan qosa, patrul­ge 1000 planşet jäne 50 ekodatchik berıldı. Jyl basynan berı jol erejelerın būzudyŋ 1 mln 2 myŋ oqiǧasy öŋdeuden öttı. Būl qūqyqbūzuşylyqtyŋ jalpy somasy 5 mlrd 831 myŋ teŋgenı qūrady. Sonyŋ ışınde 3 mlrd 910 mln teŋgege aiyppūl salyndy. Mūnyŋ 3 mlrd 428 mln teŋgesı öndırıldı.
Būǧan qosa, osy jyldyŋ 9 aiynda «Sergek» jobasy 1054 qylmysty aşuǧa mümkındık berdı. Atap aitqanda, 4 kısı öltırudı, 4 qaraqşylyq oqiǧany, 70 kısı tonaudy, 99 būzaqylyqty, 341 jeke mülıktı zaŋsyz ielenudı, 37 kölıktı aidap ketudı aşqan. Bıraq qazırgı taŋda jol erejelerın būzǧany üşın hattardy jıberumen problema tuyndap otyr. Būryn būl jūmyspen Polisiia departamentı tıkelei ainalysatyn. Bügınderı osy ıs «Qazpoşta» AQ-na berıldı. Al departament osy mekemege 130 mln teŋge qaryz bolyp qalǧan. Sol sebepten atalmyş ūiym hattardy tasymaldaudan bas tartyp otyr.
Mäslihat deputattary mäselege öz közqarastaryn bıldırdı. Sonyŋ bırı – Miras Şekenov Nūr-Sūltan qalasy «Sergek» aqyldy jobasy jüzege asyrylǧan elımızdegı alǧaşqy qala ekenın atap ötıp, jobaǧa qatysty jürgızılgen saualnama nätijelerın jariialady. Soǧan säikes qala tūrǧyndarynyŋ 83,8 paiyzy «Sergektı» qoldaityndyqtaryn aitqan.