Astanadaǧy Bäiterek monumentınde balanyŋ jynysyn anyqtau üşın ūiymdastyrylatyn köŋıldı räsım «gender pati» ötıp jür, dep habarlaidy astana-akshamy.kz
Būǧan deiın äleumettık jelıde jūptardyŋ «gender keşınen» bırneşe video jüktelgen.
Azattyq Ruhy tılşısı «Bäiterek» äkımşılıgıne resmi hat joldap, räsımnıŋ baǧasy men ony ötkızu talaptary turaly sūrap kördı.
Gender reveal party – balanyŋ jynysyn anyqtau üşın jasalatyn kışıgırım toi. Qazaq saltyndaǧy «qūrsaq şaşu» dästürınıŋ jaŋartylǧan türı deuge keledı. Bolaşaq ata-ana därıgerden balanyŋ jynysyn qaǧazǧa jazyp, merekelık şarany ötkızetın jaqyndaryna, dostaryna beruın ötınedı. Osylaişa özderıne tosyn syi jasaidy. Qyzyl tüs – qyzdy, kök tüs – ūldy bolatyndaryn bıldıredı.
Bäiterek monumentında ana qūrsaǧynda jatqan säbidıŋ jynysyn bılu üşın, qyz bolsa – qyzyl, ūl bolsa – kök tüstı jarqyratu qūny 30 minutqa – 70 myŋ teŋge tūrady. Al, neke qiiu räsımın ötkızudıŋ qūny – 45 myŋ teŋge.
«Astana Venue Management» JŞS Bas direktory Mälık Hasenovtyŋ aituynşa, jarty jylda 3 ret «gender pati» ötken. Bäiterek monumentınde «gender keşınen» basqa da arnaiy jaryqtandyrudy qajet etetın ıs-şaralar ötedı eken.
«Is-şarany keşkı uaqytta ötkızuge bolady. Ūiymdastyruşy men oryndauşy aldyn ala sūraqtaryn talqylap, qajettı tüstı jäne uaqytty taŋdaidy. Sonymen qatar, halyqtyŋ qauıpsızdıgıne qater töndıretın jäne monument aumaǧyn büldıruı yqtimal materialdardy qoldanuǧa, mäselen, syrly boiau, konfetti, feierverk jäne basqalaryna rūqsat etılmeidı. Monumenttıŋ 3-qabatynda neke qiiu räsımın ötkızuge, foto jäne beinetüsırılım jürgızuge arnalǧan oryndar bar», – dedı ol.
«Astana Venue Management» JŞS – Beibıtşılık jäne kelısım saraiy, Bäiterek monumentı siiaqty Astana qalasynyŋ eŋ ırı mädeni nysandaryn basqaruşy bırtūtas kompaniia. Ol elorda äkımdıgınıŋ 100% qatysuymen qūrylǧan.
«Astana qalasynyŋ kommunaldyq mülkın «Astana Venue Management» jauapkerşılıgı şekteulı serıktestıgıne senımgerlık basqaruǧa beru turaly» Astana qalasy äkımdıgınıŋ qaulysyna säikes Bäiterek monumentın senımgerlık basqaruǧa beru turaly kelısımşarty jasalǧan. Kelısımşartqa säikes, serıktestık Bäiterek monumentınde qyzmetterdı bekıtılgen baǧa preiskuranty boiynşa aqyly negızde körsetedı», – dedı Mälık Hasenov.
