«Obereg» ukrain qauymdastyǧynyŋ jastar qanaty «Charivni Djerela» – otansüigıştıkke ündep, slavian halqynyŋ salt-dästürın keiıngı buynǧa üiretuge airyqşa atsalysyp jürgen maŋdaialdy jastar ūiymy.
Jastar qanatynyŋ müşelerı tarihi otany – Ukrainamen tyǧyz qarym-qatynasta. Jyl saiyn Odessada ötetın «Vse my deti tvoi, Ukraina» balalar jäne jasöspırımder festivalıne, qazaq-ukrain biznes forumyna qatysyp tūrady. Kievte ötken VI Düniejüzılık ukrain forumynda, ekı el arasyndaǧy jas jurnalister forumynda jastar saiasatyna qatysty talqylaularǧa ün qosty.
Jetekşısı Anastasiia Timoşenko-Borovik: «Jalpy, bızder jastar mäselesıne belsendı aralasamyz. Mysaly, bızdıŋ jastar qanatynyŋ müşelerı Qazaqstan halqy Assambleiasynyŋ keŋeitılgen otyrysynda «Konstitusiialyq reformanyŋ ūzaqmerzımdı mındetterın jüzege asyru – jastar qyzmetınıŋ basym baǧyty» degen taqyrypta baiandama oqydy. Būdan bölek, jastar ūltaralyq tatulyqqa, elordaǧa, jemqorlyqqa qarsy küreske arnalǧan türlı derektı filmder men beinerolikterge jiı tüsedı» deidı.
«Charivni Djerela» jastar qanaty Assambleia ūiymdastyratyn köptegen baiqaularda jüldegerler qatarynan jiı körınedı. Mysaly, töl mädeniet pen salt-dästürge arnalǧan üzdık beinetanystyrylym baiqauynda soŋǧy bırneşe jyl qataryna 1, 2-oryn alyp keldı. Al jastar qanatynyŋ müşesı Ekaterina Zaharchuk biyl «Miss Assambleia» saiysynda 3-oryn alyp, «Körermen közaiymy» syilyǧyna ie boldy.
Ülkenge ızet-qūrmet körsetu jaǧynan ukrain dostarymyz jarap tūr. Jastar Astana qalasyndaǧy qarttar men mügedekterge arnalǧan medisinalyq-äleumettık ortalyqqa, Ūly Otan soǧysy ardagerlerınıŋ üiıne baryp halderın sūrap tūrady. Jeŋıs künıne orai ardagerler, tyl eŋbekkerlerı üşın ūiymdastyrylǧan qaiyrymdylyq şaralarynyŋ qai-qaisysynan da qalys qalǧan emes.
– Qazaqstan halqy Assambleiasynyŋ XXII sessiiasynda Elbasy Nūrsūltan Äbışūly el ışındegı barlyq qaiyrymdylyq şaralaryn Assambleia aiasynda ötkızudı ūsynǧan bolatyn. Bız osy bastamaǧa öz ülesımızdı qosyp kelemız. Atap aitsaq, «Charivni Djerela» jastary «Karavan miloserdiia» «Rizaşylyq» şaralaryna atsalysty. Odan bölek, SOS balalar qalaşyǧyna baryp, balalarmen köŋıldı şaralar ötkızıp tūramyz, – deidı Anastasiia Iýrevna.
Anastasiianyŋ özı balalarǧa qoldanbaly-sändık önerınen tegın şeberlık sabaǧyn ötkızedı. Sonymen qatar, tūrmysy tömen, az qamtylǧan otbasy balalaryn tabiǧatqa, qaladaǧy muzei, körme ortalyqtaryna ekskursiiaǧa jiı alyp şyǧady. Būl rette jastar qanatynyŋ ūiymdastyruymen ata-anasynyŋ qamqorlyǧynsyz qalǧan balalalar Ukrainanyŋ Sudak qalasyndaǧy halyqaralyq «Artek», «Molodaia gvardiia» lagerlerınde ärı densaulyqtaryn tüzep, ärı demalyp qaitqanyn da aitpai ketuge bolmaidy.
«Charivni Djerela» jastar qanaty ūltaralyq jäne konfessiiaaralyq tatulyq pen kelısımdı ūdaiy nasihattap jüredı. Mektep oquşylarymen, studenttermen kezdesu barysynda qazaq halqy men ukrain halqy arasyndaǧy tarihi bailanys tamyrlary turaly taǧylymdyq därıster oqidy. Jyl saiyn Halyqtar dostyǧy festivalınde, Ukrain ūltynyŋ ūly perzentı, kobzar Taras Şevchenko atyndaǧy oqularda öner körsetedı; Petr Iаsik atyndaǧy ukrain tılı bılımınen halyqaralyq baiqauǧa, «25 Slov» intellektualdyq oiynyna, «Soniaşnik» ukraintanu saiystaryna qatysyp, bırneşe märte diplomdarmen marapattaldy.
Tek ukrain halqynyŋ emes, qazaq halqynyŋ memleket tarihy men mädenietın tanytuǧa da atsalysady. Harkov qalasyndaǧy «Bırlık» qazaq qoǧamymen bırıge otyryp, ekı ūlttyŋ arasyndaǧy mädeni bailanystardy, dostyq qarym-qatynasty damytatyn şaralardy jiı ūiymdastyrady.
Ädılbek JAPAQ
