Qalalyq mäslihattyŋ kezektı sessiiasynda Astananyŋ energetika käsıporyndarynyŋ tiımdılıgın damytu jäne arttyru mäselelerı qarastyrylmaqşy. Osyǧan orai, halyq qalaulylary bas qaladaǧy bırqatar energetika keşenderınde bolyp, olardyŋ keleşektegı damu josparlarymen tanysty.
Aldymen «Astana-Teplotranzit» AQ-nyŋ №1 sorǧy stansasyna at basyn būrǧan deputattar biudjet qarajatyna salynǧan qūrylǧynyŋ jūmysymen tanysty. Aksionerlık qoǧamnyŋ Basqarma töraǧasy Aitmūqan Jūmabekovtyŋ aituynşa, «Astana-Teplotranzit» öndırıs ortasynan tūtynuşyǧa deiın jylu quaty 10 sorǧy stansasy men ūzyndyǧy 566 km jylu jelılerınıŋ kömegımen jetkızıledı. Zamanaui qūrylǧylarmen, avtomatatty basqaru jüiesınıŋ baǧdarlamalyq-tehnikalyq keşenımen jabdyqtalǧan stansa elordanyŋ oŋ jaǧalauyndaǧy Jeŋıs, Respublika daŋǧyldary men Uälihanov, Kenesary köşelerındegı tūrǧyn üilerdı jylumen qamtamasyz etedı.
Halyq qalaulylary sonymen bırge JEO-2 jäne JEO-3 nysandaryna baryp, ondaǧy qūrylys barysymen jäne elordadaǧy quat közderın damytu jönındegı jobalar men baǧdarlamalardyŋ jüzege asyrylu jaiymen tanysty. JEO-3 qūrylysy 2010 jyly tamyz aiynda bastaldy. Joba boiynşa mūnda quaty 480 Gkal tört su qainatatyn qazandyqtyŋ jäne barlyq infraqūrylymynyŋ qūrylysy qarastyrylǧan bolatyn.
«Astana-REK» nemese Astana aimaqaralyq energetikalyq kompaniiasyna qarasty «Köktem-2» jäne «Batys» aralyq stansalaryn aralau barysynda deputattar elektr energiiasyn taratumen ainalysatyn mekemenıŋ jūmysymen jaqynyraq tanysuǧa mümkındık aldy. Būl rette «Astana-REK» AQ basqarma töraǧasy Aleksandr Smorodin käsıporyn qyzmetın damytyp, qalanyŋ elektr şaruaşylyǧyn paidalanu tiımdılıgın arttyru men tehnikalyq qyzmet körsetu şaralary turaly jäne käsıporynda kürdelı jöndeu baǧdarlamasy, investisiialyq baǧdarlamalar şeŋberınde jürgızılgen qosalqy stansalar men elektr beru jelılerın qaita qūrylymdau jūmystary jönınde baiandady.
Al, «Astanaenergoservis» AQ basqarma töraǧasy Rustam Baialiev qaladaǧy energetika keşenınıŋ jai-küiı men damuy jaiynda aitty. Osy jyly basqaru kompaniianyŋ şoǧyrlandyrǧan aktivterı 153 mlrd teŋgenı qūraǧan eken. 2009 jyldan 2013 jylǧa deiın tariftıŋ şekteulı deŋgeiınıŋ ösuı arqyly 15,3 mlrd teŋgenıŋ investisiialyq baǧdarlamasy jüzege asyrylǧan. Būdan ärı holding basşysy energetika keşenınıŋ qūramynda qūrylǧan energiiamen jabdyqtauşy «Astana EnergoSbyt» kompaniiasynyŋ jūmysyna erekşe toqtala otyryp, Elbasy tapsyrmasyna säikes elektrondyq formatta körsetıletın qyzmetter sanyn köbeitıp, kommunaldyq qyzmetter aqysyn bıryŋǧai tölem qūjattary arqyly töleudı qamtamasyz etu üşın jūmys toby qūrylǧanyn jetkızdı.
«Astana-Energiia» AQ basqarma töraǧasynyŋ bırınşı orynbasary Oleg Utkin qalanyŋ negızgı energiia öndıretın ūiymynyŋ jūmysy turaly äŋgımelesedı. Sonymen, halyq qalaulylary soŋǧy kezde energetikalyq nysandar qyzmetınıŋ jaqsarǧanyn öz közderımen körıp, būl saladaǧy oŋ özgerısterge kuä boldy.
