Qalalyq mäslihattyŋ deputattary Qazaqstan mügedekterı odaǧy men «Tūran-Profi» Halyqaralyq Käsıptık Akademiiasynda bolyp, tynys-tırşılıgımen tanysty.
Mäslihattyŋ kezektı sessiiasyna daiyndalu barysynda būl şara «Jūmyspen qamtu-2020» baǧdarlamasynyŋ Astana qalasynda qalaişa ıske asyrylyp jatqanyn bılu maqsatynda ūiymdastyryldy. Osyǧan orai, halyq qalaulylary aldymen Qazaqstan mügedekterı odaǧyna bas sūqty. 2005 jyly aşylǧan mekemede mügedekterdıŋ jūmys ısteuıne barlyq jaǧdai jasalǧan. Mekemede jyl saiyn «Şeksız mümkındıkter» atty aksiia ūiymdastyrylady eken. Būl öz kezegınde, mümkındıgı şekteulı azamattardyŋ jūmysqa ornalasuy men olardyŋ qoǧamdyq ömırge beiımdeluıne jol aşady. Odaqtyŋ arqasynda 2011 jyly mümkındıgı şekteulı azamattarǧa laiyqtalyp salynǧan «Janat» tūrǧyn üi keşenı paidalanuǧa berılgen. Al, 2012 jyly qazırgı zaman jaǧdaiynda mügedekterdı jūmysqa ornalastyrudyŋ jobasy äzırlendı. Sonymen bırge odaq janynda mügedekter arbasyn jinastyru men jöndeu sehy jūmys ısteidı. Onda osy mümkındıgı şekteulı adamdardyŋ özderı jūmyspen qamtylǧan. Taǧy bır jaŋalyq: Astanada mügedekterge arnalǧan arnaiy kölık türı – invataksi ıske qosylǧan. Ökınışke qarai, bügınde bas qalamyzdaǧy qoǧamdyq kölıkterde mümkındıgı şekteulı azamattardy tasymaldau jaǧy mülde qarastyrylmaǧan.
– Bügıngı taŋda Astanada osyndai bes invataksi bar. Bıraq, būl tym azdyq etıp otyr. Jürıp-tūru yŋǧaily bolu üşın bızge älı de osyndai 20 kölık kerek, – deidı Qazaqstan mügedekterı odaǧynyŋ prezidentı Janat Omarbekov.
Şynynda da, bügınde qolda bar bes invataksi qaladaǧy arbaǧa tanylǧan 580 adamnyŋ bärıne bırdei uaqytyly qyzmet körsete almaidy. Osyǧan orai, elordalyq halyq qalaulylary būl mäselenıŋ şeşıluıne qolūşyn berudı qarastyratyn boldy.
Sonymen bırge mügedekterdıŋ jūmyspen qamtyluy da älı künge deiın özektılıgın joimai keledı. Būl rette J.Omarbekov bırde-bır memlekettıŋ mümkındıgı şekteulı azamattardy tolyqtai qamqorlyǧyna ala almaitynyn eskere otyryp: «Bızge mügedekterge arnalǧan qajettı jūmys oryndary men jūmys beruşılerdıŋ tızımın berseŋızder. Dene müşelerındegı kemıstıkter bolmasa, bız de barlyq adamdarmen bırdeimız, mügedekter de jūmys ıstei alady. Sondyqtan olar qoǧamnan şettetılmeuı kerek» dep, olardy jūmyspen qamtu qajettıgın alǧa tartty.
«Tūran-Profi» Halyqaralyq käsıptık akademiiasynda bolǧanda aŋǧarǧanymyz, atalmyş oqu orny kelesı oqu jylynan bastap oquşylardy injener mamandyǧy boiynşa da oqytpaqşy. Akademiianyŋ rektory Manen Omarov deputattardy osy baǧytta jürgızılıp jatqan jūmystarmen tanystyrdy.
Jalpy, bılım mekemesı elektronika jäne radiotehnika salasynda eleulı tabystarǧa qol jetkızgen. Kezdesude dıttelgen jerıne jyqpyl-jyqpyl kedergılerdı de elemei jetuge qabılettı oqu robottary deputattar nazaryna ūsynyldy. Sondai-aq, EKSPO-2017 körmesıne daiyndyq şeŋberınde akademiiada köp jūmystar jürgızılıp jatqanyna kuä bolyp qaittyq.
Gülbarşyn ÖKEŞQYZY
