Äliianyŋ «än gäkkuı»
Ūlystyŋ ūly künı qarsaŋynda «Qazaqstan» ortalyq konsert zalynda jas änşı Äliia Äbıken «Än gäkkuı» atty merekelık konsertın ötkızedı. Qazaq estradasynda halyq änderın naqyşyna keltırıp oryndaityn onyŋ repertuaryndaǧy tuyndylardyŋ köbı sözı men äuenı üilesım tapqan halyq änderı. Şyǧarmaşylyq talǧamy joǧary änşınıŋ merekelık baǧdarlamasy jaily osy konserttı ūiymdastyruşy, Qazaqstannyŋ Eŋbek sıŋırgen ärtısı Maira Iliiasovamen äŋgımelesken edık.
– Maira apai, Äliianyŋ konsertın ūiymdastyryp jürgen önerdegı janaşyr äpkesı bolasyz. Astana törınde ötetın konsertke daiyndyqtaryŋyz qalai?
– Bügınde daiyndyq jūmystary jürıp jatyr. Qala äkımdıgınıŋ qoldauymen 22 nauryz künı elordalyqtarǧa qazaqtyŋ tamaşa dästürlı änderınen şaşu şaşyp, merekelık baǧdarlamamyzdy ūsynamyz. Talǧamy biık, tyŋdarmany köp änşınıŋ elorda törınde Nauryz toiy qarsaŋynda öner körsetuı – qazaqtyŋ änıne berılgen ülken baǧa dep bılemın.
– Bügıngı qazaq estradasynda halyq änderın ädemı oryndaityn änşıler sausaqpen sanarlyq. Būl rette Äliianyŋ şyǧarmaşylyǧy turaly ne aitasyz?
– Äliianyŋ önerın alǧaş Maqpal Jünısovanyŋ esep beru keşınde kördım. Onyŋ boiyndaǧy qazaq qyzyna tän qasietterı, sahnada özın-özı ūstauy, eşkımge ūqsamaityn sahnalyq kiım ülgısı maǧan qatty ūnady. Talantty änşıge Maqpal Jünısova qoldau körsetken. Odan keiın özımnıŋ «Jan anam», «Saǧyndyrǧan änder-ai» jobalaryma qatystyrdym. «Qasymda bolyp, maǧan kömektesseŋız» dep qolqa salǧan soŋ, Äliiamen bırge el aralap, şyǧarmaşylyq keşterın ötkızıp jatyrmyz. Halyq öz baǧasyn berdı.
Astanada ötetın keşte änşı «Büldırgen», «Esıl dünie-ai», «Būlbūlym» «Alaqannan ūşqan aqquym» syndy halyqtyq tuyndylarmen qatar «Ökınış tamşylary», «Ömırge saual» syndy filosofiialyq maǧynasy tereŋ änderın oryndaidy. Ekı saǧatqa sozylatyn ädemı keşte halyq änderı ǧana şyrqalady.
– Keş qonaqtary kımder?
– Konsertte özım än salamyn. Dästürlı änşı Läzzat Jolamanova, «Sazgen» ansamblı, sonymen qatar Meirambek Besbaevtyŋ «Tartu» toby öner körsetedı. Odan bölek äjelerımız, sarbazdarymyz jäne myŋ būralǧan bişılerımız de bar.
– Äŋgımeŋızge rahmet!
Gülmira Aimaǧanbet