Elorda halqynyŋ üşten bır bölıgı qoǧamdyq kölık qyzmetıne jügınedı. Osy jait eskerılıp, ötken şılde aiynyŋ aiaǧynda Astana qalasy Jolauşylar kölıgı jäne avtomobil joldary basqarmasy men qalalyq IID Äkımşılık polisiia basqarmasynyŋ qoldauymen «Bus Lane» jobasy ıske qosyldy. Halyqty kerek jerıne jedel ärı qauıpsız jaǧdaida jetkızu maqsatyn közdegen atalmyş joba aiasynda şahar joldarynda qoǧamdyq kölıkke arnalǧan jolaqtar salyndy.
Äzırge mūndai jolaqtardy Bauyrjan Momyşūly (Abylai han daŋǧylynan bastap Saraişyq köşesıne deiıngı aralyq, ūzyndyǧy – 2,84 km) jäne Bögenbai batyr (Uälihanov köşesınen Saryarqa köşesıne deiıngı jol bölıgı, ūzyndyǧy – 2,15 km) daŋǧyldary boiymen jüretın avtobustar paidalanuda. Bıraq, jyl aiaǧyna deiın olardyŋ sanyn arttyru josparlanǧan. «Astana LRT» JŞS baspasöz qyzmetınıŋ habarlauynşa, jyl aiaqtalǧanşa osyndai jolaqtar sol jaǧalauda salynady. Oŋ jaǧalauǧa qaraǧanda sol jaǧalaudaǧy joldar keŋdeu keletındıkten basymdyq osyǧan berılıp otyr.
«Bus Lane» jobasynyŋ artyqşylyqtaryn söz etsek, ol qoǧamdyq kölıktıŋ qozǧalys kestesın rettep, kesteden auytqu jaǧdailaryn tömendetedı jäne joldaǧy qauıpsızdıktı küşeitedı. Sondai-aq, avtobustardyŋ ortaşa jyldamdyǧyn 20 paiyzǧa arttyrady. Qarapaiym tılmen aitsaq, qoǧamdyq kölık jürgızuşılerı būl joba arqyly tärtıpke üirenedı. Jolaqtar salynǧan joldarda bırı ekınşısımen jaryspai, jolauşylardyŋ jäne özderınıŋ ömırıne jauapkerşılıktı sezıne bastaidy.
Aita keter jait, kölık mamandarynyŋ bılıktılıgın arttyru ortalyǧynda avtobus jürgızuşılerı üşın «Bus Lane» jobasy boiynşa qosymşa saǧattar qosylǧan. Jobanyŋ qyr-syrymen olar sol jerde tanysuda.
Būl joba ıske qosylǧan uaqyttan berı ekı apta öttı. Alǧaşqy kezeŋde jürgızuşıler būǧan üirensın degen nietpen avtobus jolaǧyna kırıp ketken özge kölık türlerınıŋ ielerı eşqandai jauapkerşılıkke tartylmady. 11 tamyzdan bastap qana arnaiy jolaqtar tolyqqandy jūmys rejimıne endı. Iаǧni, sol künnen bastap jolaqqa kırgender aiyppūl töleidı. Aiyppūl kölemı 5 ailyq eseptık körsetkışke teŋ nemese 9910 teŋge. Qalalyq IID Äkımşılık polisiia basqarmasynyŋ aǧa inspektory Baqytjan Altybaevtyŋ aituynşa, ekınşı märte säikes erejenı būzǧandar üşın aiyppūl ekı esege köbeiedı. Bır eskerter jait, arnauly organdardyŋ kölıkterıne dabyl qosyp atalǧan jolaqtarmen jüruge rūqsat etıledı. Sondai-aq, özge kölık ielerıne jolauşylardy mıngızıp, tüsıru üşın de būl jolaqtarǧa kıruge bolady.
Qazırgı taŋda aǧymdaǧy jyldyŋ soŋyna deiın qosymşa jolaqtardy salu mäselesı şeşılude. Naqtyraq aitsaq, olardy ornalastyru jerı boiynşa säikes syzbalar jasaluda.
Amanǧali QALJANOV
