Ejelgı Aqmola, bügıngı Astanamyz elımızdıŋ bas qalasy atalǧannan berı keremettei körkeiıp, qūrylysy qarqyndy qadammen ösıp, ülken megapoliske ainaldy. Bügınde qala tūrǧyndarynyŋ sany bır millionnan asty. Äitse de kündelıktı qala tırşılıgınde köŋılge qonymsyz «ättegen-ailar» joq emes.
Bız Esıldıŋ oŋ jaǧalauyndaǧy qalanyŋ ortalyǧynda, L.Paster köşesınde tūramyz. Köşemızge asfalt töselgen, jaiau jürgınşılerge arnalǧan trotuar bar. Sondai-aq su qūbyry, ortalyq kanalizasiia jüiesı tartylyp, köşe jaryǧy da tolyq şeşılgen. Qysqasy, tūrmysqa qolaily jaǧdai jasalǧan şaǧyn mekenjaiymyz Baiqoŋyr audanyna qaraidy. Alaida ekı jyldan asty, berekemız qaşty. 2021 jyly Asan qaiǧy köşesın keŋeitemız degen maqsatpen Lui Paster köşesınıŋ boiyndaǧy tört üi ysyrylyp tastalǧan edı. Sodan berı būl oryn bos, tek qalǧan aǧaş terekter soraiyp-soraiyp tūr. Jol saluǧa arnalǧan jer kül-qoqys, qūrylys jöndeu jūmysynan qalǧan zattar tögetın alaŋǧa ainaldy. Eŋ soraqysy sol, jaz boiy būl jerge öŋkei araq ışetınder jinalyp, üisız-küisız qaŋǧybastar osynda tünep te jüredı. Basty qauıp – bala-nemerelerımız üşın eleŋdeimız. Jaqynda Lui Paster köşesı №100 üide tūratyn körşım:
– Biyl segız tonna kömırdı amalsyzdan esık aldynan saraiǧa şelekpen tasydyq. Öitkenı Asan qaiǧy köşesı jaǧynan otyn qora terezesıne baratyn jol kül-qoqyspen jabylyp qalǧan. Jylda kömırdı tıkelei osy terezeden laqtyryp kırgızıp alatynbyz. Endı qiyn boldy, – dep renış bıldırdı.
Şyndyǧynda, bız kımge renjuımız kerek? Elordanyŋ törınde otyryp, anyqtap aitsaq, Şoqan Uälihanov jäne Kenesary men Abai daŋǧyldary ötetın ortalyq audanda tūryp, osyndai olqylyqqa, keleŋsız körınıske tözuge bola ma? Sondyqtan būl janaiqaiymyzǧa qala äkımı nazar audarsa eken degen ülken ümıt, ötınışpen gazetke jazuǧa mäjbür boldyq.
Bimende QAZANQAP,
eŋbek ardagerı, zeinetker
