Toty ÄMIROVA,
ūşqyş:
–Aibynyn asyryp, aişyqty şahar saldyq. Astana körkeidi.
Al şahardyŋ işki-jan düniesine qanşalyqty män berip jatyrmyz? Meniŋşe, maŋyzdysy osy…
Astanaǧa armanyn ūştap, qanattanyp keletinder köp. Qalanyŋ qarbalasty tirşiligine ärkim özinşe üles qosyp jatyr. Degenmen qoǧamdyq oryndarda qyzmet körsetu sapasy äli de bolsa, tolyqtyrudy qajet etedi.
Mäselen sauda oryndaryna barǧanda, satuşy aldymen bas-aiaǧyŋyzǧa şolu jasaidy. Mūnysy «bizden birdeŋe aluǧa şamasy jete me?» dep küdiktengeni. Üstine jaqsysyn japsyryp, syqiyp kiingen adamǧa zyr jügirip qyzmet körsetedi.
Älemniŋ damyǧan elderinde qoǧamdyq qyzmet körsetu jüiesi äldeqaida jetilgen. Tabaldyryqtan attaǧanyŋyzdan jymiia qarsy alady. Qaida baratynyŋyz, kimmen kezdesu kerektigin sūrap, jön silteidi. Siz qyzyqqan närseni tanystyryp ötedi. Tipti, almasaŋyz da öz erkiŋiz.
Bizde būǧan da män bergen abzal. Özinşe bir mädeniet qalyptastyru kerek. Mäsele tek satuşyda ǧana emes…
Älemdegi turizm keremet damyǧan elder qai qonaq kelse de, jaiylyp jastyq bolady. Turister olarǧa kiris közi, biraq mädenietti türde qyzmet körsetu būl elderde qalypty jaitqa ainalǧan. Ärkimniŋ oǧan sanasy jetedi.
Mūndaǧy sauda oryndary, meimanhana, meiramhanalar keletin qonaq jöninde aldyn ala aqpar jinaidy. Kim bolsyn, bir sözben aitqanda, olarǧa märtebeli meiman. Şeteldikterge arnap jeŋildikter de jasaidy.
İtaliiada jürgenimde bir dükennen zat satyp aldym. Satuşymen äŋgime barysynda būl firmanyŋ jädigerleri ūnaityndyǧyn aityp qaldym. Söitsem, ol jymiyp, däl osyndai būiymdy meniŋ bir-eki ai būryn Dubaidan satyp alǧanymdy aityp tūr. Qatty taŋǧaldym. Mine, qyzmet körsetude osyndai ilgerleu bizge jetpei jatady.
Amangül QŪMAR,
«Han şatyr» oiyn-sauyq jäne sauda ortalyǧy, Sinnabonda kassiri:
– Köppen jūmys isteudiŋ jauapkerşiligi ülken. Ärkimniŋ köŋilinen şyǧuǧa tyrysasyŋ. Şamaŋ kelgenşe sypaiylyqpen qyzmet körsetkiŋ keledi. Biraq ala taŋnan, qara keşke deiin bir orynda tapjylmai otyru şarşa-typ jiberedi. Sezdirmeuge tyrysasyŋ, degenmen kei adamdar ünsiz qyzmet körsetkeniŋe de şamdanyp jatady.
Meniŋşe, är käsiporyn tūtynuşymen qarym-qatynasty jaqsarta tüsuge talpynu kerek. Būl – onyŋ bolaşaǧy üşin maŋyzdy.
Adamdar özine jyly şyraimen qyzmet körsetip, är närseni jiti tüsindirgenin qalap tūrady. Eger biz sol deŋgeide qyzmet körsete alsaq, ol bizdiŋ qyzmet jüiesine jüginudi dästürge ainaldyrady. Sondyqtan, būǧan kei käsiporyndar nemqūrailylyq tanytady.
Biliktiligin arttyryp, mädenietin qalyptastyru üşin satuşy, kassir, daiaşy jäne taǧy basqa mamandarǧa arnalǧan kurstar qajet siiaqty.
Janbolat ESEI,
student:
–Japondyqtar – öte mädenietti el. Mäselen, dämhanada bir zatyŋyzdy ūmytyp ketseŋiz, ol dereu iesine qaitarylady. Dämhana qojaiyny būl zattyŋ kimge tiesili ekenin anyqtap, meken-jaiyna özi jetkizip beredi. Eŋ qyzyqtysy, sol zatty öziniŋ dämhanasynda ūmytyp ketkeniŋiz üşin ol sizden keşirim sūraidy eken. Olar siz tamaqtanyp bolǧan soŋ, qandai tamaq ūnady nemese ūnamady degendi de sūraidy. Eger ūnamai qalǧan närse bolsa, sizden taǧy keşirim sūraidy.
Būdan ne tüiuge bolady? Olardyŋ adamǧa degen syilastyǧy, sypaiylyǧy erekşe.
Qoǧamdyq oryndarda qyzmet körsetu mädenieti bizde äli qalyptaspaǧan. Bir-eki auyz eskertu aitsaŋ, döreki minez tanytyp, şapşyp şyǧa keletinder bar. Meniŋşe, jūmys beruşilerge de köp närse bailanysty. Olar öz qyzmetkerine talap qoia bilu kerek, sosyn keibireuler daiaşyny jūmysqa alsa, keiin oǧan ydys ta, eden de juǧyzyp qoiady. Ai aiaǧynda bärine ortaq tiyn-teben töleidi. Būdan keiin biz ol adamnyŋ özimizge sypaiy qyzmet körsetpegeni üşin renjip jatamyz. Sondyqtan jalpy jüiedegi kikiljiŋderdi retteu kerek.
P.S:
Astanaǧa at basyn būrǧan aǧaiynnyŋ bäri birdei emes. Biraq «astanalyqtar» degen ortaq atau olarǧa äldeqaşan berilip qoiǧan. Bas qalanyŋ ortaq qazanynda qainap, bir qalypqa tüsu, tirlikke beiimdelu ärkimde ärqalai. Osylaişa Astana bolmysy qalyptasyp keledi.
Mūny nelikten aityp otyrmyz. Bas qalanyŋ äleueti, mädenieti, ruhani jany, türli tūrmys-jaǧdaiy biz üşin öte maŋyzdy. Jaqsysyn körseŋ, janyŋ semiredi, jamanynan köŋiliŋ qalady. Ärine, qai salada bolmasyn jetistikter men kemşilikter bolyp jatar. Degenmen, Astananyŋ äleuetin arttyryp, onyŋ mädenietine özinşe üles qosu – ärkimniŋ öz qolynda…
Serikgül SŪLTANQAJY
