Būdan bylai Astanada da qatty tūrmystyq qaldyqtar konteinerge bırden sūryptalyp tastalady. Dünie jüzılık qorşaǧan ortany qorǧau künı qarsaŋynda Astana qalasy äkımdıgı men «ÖKM Operatory» JŞS-tıŋ ūiymdastyruymen qanatqaqty jobany ıske qosuǧa arnalǧan «Qaita öŋdeuge» atty ekologiialyq asar öttı.
«Qazaqstan» sport saraiynyŋ alaŋynda ötken şara barysynda qatty tūrmystyq qaldyqtar qabyldanyp, qaita öŋdeuden şyqqan önımder jūrtşylyq nazaryna ūsynylyp, balalarǧa arnalǧan tanymdyq baǧdarlama ūiymdastyryldy. Sonymen, elordada tūrmystyq qaldyqtardy ekıge (qūrǧaq jäne ylǧaldy) bölıp tastaudyŋ pilottyq jobasyn engızu qolǧa alyna bastady. Endı şılde aiynan bastap qaladaǧy 2070 qoqys alaŋyna (Astana alaŋdary 100 paiyzǧa qamtylady) 6 275 konteiner qoiylady. Sary jäne jasyl tüstı konteinerlerge tūrmystyq qaldyqtar sūryptalyp tastalady. Mysaly, sary tüstı konteinerge metall, plastik, qaǧaz, şyny siiaqty qaita öŋdeuge jaramdy qaldyqtar tastalsa, jasyl konteinerge taǧamnan qalǧan organikalyq jäne basqa da öŋdeuge kelmeitın qaldyqtar salynady.
«Jyl saiyn Qazaqstanda 5,5 million tonnadan asa qatty tūrmystyq qaldyq jinalsa, Astananyŋ özınen bır jylda şyǧarylatyn qaldyq kölemı 300 myŋ tonnaǧa jetıp jyǧylady. Iаǧni, künıne qaladan 1 myŋ tonnaǧa juyq qaldyq şyǧady degen söz. Osy rette qaldyqty bölek tastau qoqys poligonyna tüsetın kölemdı azaitady. Sonymen qatar tabiǧi resurs ünemdelıp, elımızde qaita öŋdeu salasynyŋ damuyna jol aşady» deidı «ÖKM Operatory» JŞS baspasöz hatşysy Jomart Raqymjan.
Aua raiynyŋ qolaisyzdyǧyna qaramastan ekologiialyq şaraǧa belsendı qatysqan jüzdegen qala tūrǧyny 300 kelı elektr jäne elektrondy qūraldar men 405 kg makulatura, 120 kelı plastikalyq bötelke, 100 kelı şyny, 14 kelı batareia, 85 kelı synapty şam, 20 kelı kiım-keşek qaldyǧyn tapsyrdy. Şara soŋynda 1 tonnadan asa qaldyq qaladaǧy qaita öŋdeu zauytyna jıberıldı.
Atalmyş şara aiasynda ısten şyqqan tūrmystyq elektr tehnikalaryn tegın alyp ketetın jaŋa ekologiialyq «Clean taxi» jobasy tanystyryldy.
