Elorda törınde Qazaq küresınen Aziia chempionatynyŋ jalauy jelbıredı. Bairaqty bäsekede 11 eldıŋ 77 baluany 8 salmaq därejesı boiynşa baq synady.
Mädeniet jäne sport ministrlıgı men Astana qalasy äkımdıgınıŋ, «Samūryq-Qazyna» ūlttyq äl-auqat qorynyŋ, ERG Euraziialyq tobynyŋ jäne «Elorda aqparat» mediakompaniianyŋ qoldauymen, Halyqaralyq Qazaq küresı federasiiasynyŋ ūiymdastyruymen ötken chempionatta Gruziia, Özbekstan, Litva, Ukraina elderınen kelgen jäne Astana men Almaty, Semei qalalarynan şaqyrylǧan halyqaralyq därejedegı 16 sport töreşısı baluandardyŋ küresıne qazylyq ettı.
Janküier qauym «Däulet» sport keşenıne lyq toldy. Jarystyŋ aşylu saltanatynda söz söilegen Mädeniet jäne sport ministrı Arystanbek Mūhamediūly barşa sportşyǧa sättılık tıledı.
Tartysty bäsekede Aziianyŋ kıl myqtylarymen beldesken qazaq baluandary şaşasyna şaŋ jūqtyrmady. Mysaly, chempionattyŋ eŋ tömengı salmaq därejesınde qazaqstandyq Erbol Alduhan qarsylas şaq keltırmedı. Aqtyq saiysta moŋǧoliialyq Buhchuiun Davaanaiammen kezdesken ol qarsylasyn tıze büktırıp, alǧaşqy altyndy qorjynǧa saldy. Būl salmaqta qola medaldı täjıkstandyq Oiatolla Qojaev ielendı. Al 60 kelıge deiıngı salmaq därejesınde qazaq baluany Ospan Dauylbai Özbekstannan kelgen Şohruh Nuriddinovpen beldestı. Olardyŋ bäsekesı öte tartysty ötıp, qos baluan bır-bırıne soŋyna deiın berıspei baqty. Aqyry beldesuge ūlasqan küres soŋynda jeŋıs Ospan Dauylbaidyŋ enşısıne būiyrdy. Qola medaldı moŋǧol baluany Lhagvajamts Unibjled, japon baluany İppei Nakano, irandyq Sajjad Karamian Gandombaniler bölıstı. 66 kelı salmaqta küresken qazaqstandyq Nūrbolat Izımǧaliev finalda moŋǧoliialyq Bashuu İondonperenleimen jolyqty. Bäseke tartysty ötkenmen, qazaq baluany moŋǧol sportşysyna jol berıp aldy. Üşınşı oryndy täjıkstandyq Raziovlok Loikov pen özbekstandyq Doniiar Sūltanbaev ielendı. 82 kelıge deiıngı salmaqta finalǧa qazaq baluany Ersın Seiıtqazinov pen özbek baluany Älışer Qūdaibergenov şyqty. Ūzaqqa sozylǧan bäsekede qazaq baluany qarsylasynan ailasyn asyryp, Aziia chempionatynda top jardy. Atalmyş salmaqta üşınşı oryn japondyq Seii Takigaşira men moŋǧoliialyq Tümennasyn Erdenetoǧtohqa būiyrdy. 90 kelıge deiıngı salmaqta öner körsetken qazaqstandyq baluan Ädıljan Ystybaev moŋǧoliialyq baluan Tengiz Batsaihandy jeŋıp, chempion atandy. Qola jüldenı özbekstandyq Sariar İkramov pen türıkmenstandyq Durdu Nojaguliev enşıledı. Sondai-aq 100 kelıge deiıngı salmaq boiynşa aqtyq saiysta Qazaqstannyŋ namysyn qorǧaǧan Bauyrjan Qabaev baryn salǧanmen, moŋǧoliialyq Tuvşynjarǧal Gannan ailasyn asyra almady. Üşınşı oryn täjıkstandyq Kurşed Şärıpov pen türıkmenstandyq İhlas Setdarovtyŋ qorjynynda kettı. Al chempionattyŋ eŋ joǧary salmaq därejesı boiynşa aqtyq synda Moŋǧoliia baluany Serık Berdımūratpen şyqqan «Qazaqstan barysy» jäne «Älem barysy» atanǧan qazaq baluany Aibek Nūǧymarov qarsylasyn oisyrata jeŋıp, Aziianyŋ absoliuttı chempiony atandy. Jalpy, būl ekı baluan – bır-bırıne būrynnan tanys qarsylas. Ötken jylǧy «Älem barysynda» olar jartylai finalda beldesıp, kezdesude Aibek basym tüsken bolatyn. Būl joly da Aibek jeŋıstı qoldan bermedı. Chempionattyŋ qola jüldesın japon baluany Tanimoto Suzukidı ūtqan täjıkstandyq Dadohan Kurbanaliev enşıledı.
Aziia chempionatyndaǧy negızgı bäseke qazaq pen moŋǧol baluandary arasynda örbıdı. 8 salmaq boiynşa 4 altyndy qanjyǧaǧa bailaǧan qazaq baluandary komandalyq esepte de jeŋıs tūǧyrynan körınıp, myqty ekendıkterın taǧy bır däleldedı. Al 3 altyn moŋǧol, 1 altyn türkımen baluandarynyŋ enşısıne būiyrdy. Chempionattyŋ jalpy jülde qory 20 myŋ AQŞ dollaryn qūrady.
Jeŋımpazdar men jüldegerlerdı Halyqaralyq Qazaq küresı federasiiasynyŋ prezidentı Qanat Bozymbaev, Olimpiada chempiony, Qazaqstannyŋ Eŋbek Erı Jaqsylyq Üşkempırov jäne «Qazaqstan barysy» jobasynyŋ avtory Arman Şoraev syndy tūlǧalar marapattady.
