Astanada talantty rejisser, Qazaqstannyŋ eŋbek sıŋırgen qairatkerı, önertanu PhD, Qazaq ūlttyq öner universitetınıŋ professory, «Bolaşaq» tülegı, Muzykalyq jas körermen teatrynyŋ direktory Ashat Maemirovtyŋ mereilı 50 jasyna arnalǧan benefisı özı qoiǧan spektaklderı sekıldı keremet anşlagpen öttı. Būl bır jaǧynan ömırı önermen örılgen märtebelı öner iesınıŋ el aldynda esep beruı bolsa, bır jaǧynan qūrylǧanyna üş jyldyŋ jüzı bolǧan, qalyŋ körermen jinaǧan öner ordasynyŋ şyǧarmaşylyq äleuetın, zor mümkındıgın tanytqan ǧajaiyp keş edı.
Talantty rejisser şäkırtterımen bır sahnada än salyp, öleŋ oqydy, estelık aitty, syrlasty, körermenge jaŋa qyrymen, erekşe bolmysymen körındı. Benefis barysynda özı qoiǧan spektaklderdegı änderı şynaiy oryndalyp, tyŋdauşyny tamsantty, akterlerdıŋ şabyttanǧan jüzı, jarqyraǧan kostiumderı, jastyqtyŋ, jaŋaşyldyqtyŋ lebı tamsantty.
Astana qalasy äkımınıŋ orynbasary Eset Baiken qala äkımı Jeŋıs Qasymbektıŋ qūttyqtauyn jetkızse, Senat deputaty Darhan Qydyrälı Ashattyŋ öner jolyna sättılık tılep, Mäulen Äşımbaevtyŋ qūttyqtau hatyn oqyp berdı. Elordanyŋ mädeni ömırınde airyqşa oqiǧaǧa ainalǧan benefiske elımızdıŋ öner maitalmandary, teatr önerınıŋ qairatkerlerı, önerdegı ūstazdary, şäkırtterı, qoǧam qairatkerlerı, ziialy qauym ökılderı, jurnalister, jastar qatysty. Äsırese qazaqtyŋ «Qyz-Jıbegı» atanǧan Qazaqstannyŋ eŋbek sıŋırgen ärtısı, «Parasat» ordenınıŋ iegerı Meruert Ötekeşova men Qazaqstannyŋ Halyq ärtısı Güljan Äspetovanyŋ keluı, Qazaqstannyŋ Halyq ärtısı Nūrlan Önerbaevtyŋ sahnada än saluy keşke erekşe körık berdı. LED-ekran arqyly körsetılgen 91-degı anasy Däniia Valievanyŋ balasyna degen saǧynyşpen aitqan videoqūttyqtauy, tuǧan auylynyŋ beinekörınısı airyqşa äser qaldyrdy.
Qazaq önerınde erekşe qoltaŋbasymen körınıp, şäkırtterın şyǧarmaşylyqtyŋ şyŋyna jetelegen rejisser Ashat Maksimūly sahnalaǧan adami sezımderge, şynaiy mahabbatqa qūrylǧan Dulat İsabekovtıŋ «Gauhartas» atty şyǧarmasy bügınge deiın 165 märte körermen nazaryna ūsynyldy. Barlyq qoiylym anşlagpen öttı. Bilet sanauly minut ışınde ötıp ketedı. Osy aralyqta spektakldı myŋdaǧan körermen tamaşalapty. Otbasy qūndylyǧyn därıptegen drama ötken jyldyŋ üzdıgı dep tanylyp, Mädeniet jäne aqparat ministrlıgı ūiymdastyrǧan öner salasyndaǧy «Umai-2023» ūlttyq syilyǧyn ielendı.
Ärıptesımızdıŋ ne üşın taŋdau «Gauhartasqa» tüstı degen saualyna Ashat Maemirov bylai jauap bergenı este: «Sahnaǧa bügınnıŋ qaharmandaryn şyǧaruym kerek. Olar – auyl adamdary, därıger, tynyştyq küzetşısı, qarapaiym eŋbek adamdary boluǧa tiıs. Esıme Dulat İsabekovtıŋ «Gauhartasy» tüstı. Jalma-jan qaitadan paraqtap şyqtym. Bala kezımnen sanama sıŋıp qalǧan obrazdarmen qaita tabystym. Kinoda Käuken Kenjetaev oinaǧan Tūrymbet äke, Ämina Ömırzaqova somdaǧan ana, Änuar Boranbaev oinaǧan Tastan, Doshan Joljaqsynov oinaǧan Äskerbektıŋ obrazy köz aldymnan öttı. Janna Quanyşevanyŋ oinaǧan Saltanaty qandai şırkın! «Gauhartas» – 25 jastaǧy jazuşy Dulat İsabekovtıŋ adam janyn aiausyz jalaŋaştap ūsynǧan şyǧarmasy. Mūnda artyq boiau joq. Osyǧan taǧy bır märte közım jettı. Onda adam bar. Qazaqtyŋ bolmysy, qūndylyǧy bar. Sony bügıngı Tik-Tok-ta otyrǧan jas ūrpaq tüsınuı, ūǧuy qajet. Atalarynyŋ, äjelerınıŋ bastan keşken sezımın sezınuge tiıs. «Gauhartas» – ädebi şyǧarma retınde qazaq ädebietınde de, şetelde de äbden moiyndalǧan dünie. Kino retınde de körermennıŋ köŋılınen şyqty. Men osy şyǧarmaǧa qylaudai da kırbıŋ tüsırmeuım qajet. Kerısınşe, ony tolyqtyryp, ajaryn aşatyndai dünie jasauym kerek. Ol üşın äuelı janryn anyqtap alǧan abzal. Teatrymnyŋ baǧyty – muzykalyq teatr, sondyqtan da muzykalyq drama retınde ūsynamyz, ışınde hormen än aitylady dep avtordyŋ rūqsatyn alyp aldym» degen Ashat Maemirov, şynynda da, qazaq önerındegı aiauly tūlǧalardy jastardyŋ teatr sahnasynda jarqyratyp körsettı. Qalyŋ körermennıŋ joǧary baǧasyn aldy, akterler şyrqaǧan änder jastardy adami qarym-qatynasqa jetelegen, şynaiy mahabbatqa ündegen şyǧarma retınde körkem düniege ainaldy. Qazırgıdei sifrlyq zamanda adami qarym-qatynas, jandy bailanys özektı. Būl jäne jaqsy trendke ainalyp kele jatyr.
Ashat Maksimūlynyŋ şeberhanasynan şyqqan talantty ūl-qyzdar özı qūrǧan Muzykalyq jas körermender teatrynda da, basqa da elımızdıŋ öner oşaqtarynda zor tabyspen jūmys ıstep jürgenın bılemız. Muzykalyq jas körermen teatry 2020 jyly 14 jeltoqsanda «Abai-Toǧjan» muzykalyq dramasymen resmi aşylǧany belgılı. Qūramynda 70 akterı bar teatrdyŋ Qazaqstanda balamasy joq. Öner ordasy uaqyttyŋ sūranysyna orai qazırgı jastardy teatrǧa tartu üşın kameralyq orkestr men etno-folklorlyq ansamblı bar ūjymnan qūraldy. Onda akterlık şeberlıgımen qatar vokaldyq mümkındıgı joǧary, än salumen qatar jaqsy bileitın talantty jastar jinaldy. Muzykalyq jas körermen teatrynyŋ aşyluy qazaq mädeni önerındegı tyŋ jaŋalyq, bölek tynys bolatyn.
– Balalar: «Aǧai, bız özımızdıŋ laiyqty ornymyz bar ekenın däleldeuımız kerek» dedı. Däleldedık dep oilaimyn. Senbeitınder ekı jarym jyl uaqyt ışınde körermen köŋılınen şyqqan 17 qoiylymdy kelıp körsın, – deidı Ashat Maksimūly.
Osy üş jylǧa juyq uaqyt ışınde 14 şaŋyraq boi kötergenı de Ashat bastaǧan tatu ūjymnyŋ bereke-bırlıgın, önermen örılgen ömırın paş etkendei.
– Özım köpbalaly äulette tuyp, 10 balanyŋ ortasynda tärbielengendıkten, ainalamdy bauyr tūtyp, şäkırtterımdı öz balamdai jaqsy köremın. Özımız ırgesın qalaǧan Muzykalyq jas körermen teatryndaǧy ärbır ärtıstıŋ taǧdyryna jauaptymyn, olarǧa bılgenımdı üiretıp, bılmegenın körsetuge tyrysamyn. Öitkenı özım qol bastaǧan kösem, söz bastaǧan şeşen Syrym Datūlynyŋ tuǧan topyraǧynda tuyp, sol aiadai ǧana auylda, qaimaǧy būzylmaǧan qazaqy auylda ösıp-öndım, jetıldım. Bala armanyma qanat bailap, Almatydaǧy T.Jürgenov atyndaǧy Qazaq ūlttyq öner akademiiasyna rejisser mamandyǧyna oquǧa tüstım, «Bolaşaqpen» Parijde oqydym, Reseide bılım aldym, 2015 jyly Astanada ǧylymi dissertasiiamdy qorǧap, öner men ǧylymdy bailanystyru arqyly biık maqsatqa jettım, – deidı benefis iesı tolqyp tūryp.
Osylaişa, jergılıktı jäne älemdık teatr mamandarynan tälım alyp, käsıbi bılımın ūştaǧan maman otandyq öner men mädeniet salasynyŋ bılıktı menedjerı retınde de özın tanyta bıldı. Teatr qūrylǧannan bastap bırge kele jatqan halyqaralyq Kann festivalınıŋ jeŋımpazy Samal Esliamova, Qazaqstannyŋ eŋbek sıŋırgen qairatkerı Berık Aitjanov, memlekettık «Daryn» jastar syilyǧynyŋ laureattary Asylhan Tölepov pen Aian Ötepbergen de A.Maemirovqa demeu bolǧan öner tarlandary.
Benefiste teatr sahnasynda qoiylǧan M.Äuezovtıŋ «Abai-Toǧjan», N.Moşinanyŋ «Dünie-ǧapyl», M.Omarovanyŋ «Şämşı», «Chanel №5», E.Olbidıŋ «Zoopark», «Kelşı, aiym» änın leitmotiv etıp alǧan D.İsabekovtıŋ «Gauhartas», Ǧ.Müsırepovtıŋ «Qyz Jıbek», A.Volodinnıŋ «Qoştasqym kelmeidı» spektaklderınen äuezdı änder şyrqalyp, kei qoiylymdardan üzındı qoiyldy. Ashattyŋ jaŋaşyldyǧyn, käsıbilıgın, kısılıgın tanytqan, talailar auzynda jürer tamaşa keş boldy. Tanymal öner jūldyzdary Qanat, Svetlana Aitbaevtardyŋ oryndauyndaǧy änder jürekke jettı. Önerde suretkerlıkpen zor tabysqa jetken öner iesı ömırde jary Nūrgülmen ekı ūl ösırıp, qazır zaiyby ekeuı nemerelerınıŋ baqytty ata-äjesı atanyp otyrǧan jandar. Öner saparynda özı aitqan tereŋ eŋbekpen, talǧammen, erekşe estelıktermen, jaqsy adamdarmen örılgen ǧūmyry ǧibratqa toly, älı bererı de köp. Mereitoi iesın jaŋa belesımen qūttyqtap, şyǧarmaşylyq tabys, örleu tıleimız!
