TEGIN QŪQYQTYQ KEŊES ALDY
Osy aptada Astana qalasy boiynşa Ekonomikalyq qylmysqa jäne sybailas jemqorlyqqa qarsy küres departamentınde aşyq esık künı öttı. Qala tūrǧyndary men qonaqtary tolǧandyryp jürgen saualdaryna mamandardan tegın qūqyqtyq keŋes aldy. Şara turaly departamenttıŋ qūjat ainalymyn qamtamasyz etu jäne baqylau bölımı bastyǧy Almagül Kenebaeva aityp berdı.
– Almagül Ersınqyzy, elordalyqtarǧa qūqyqtyq tüsındırudı maqsat etken şaranyŋ maŋyzy zor bügınde. Dese de, artyqşylyqtaryn äŋgımeleŋızşı.
– Bırınşıden, qūqyqtyq sauattylyqty därıpteu. Ekınşıden, türlı sanattaǧy halyqtyŋ pıkırın tyŋdap, zaŋnamalyq sipattaǧy sūraqtarǧa jauap beru, bırlesıp şeşu. Halyqty memlekettık jäne qūqyq qorǧau organdarymen erkın tıldesuge mümkındık qarastyru. Aityp ötken jön, jaǧymdy dialog konstruktivtı formatta ötkızıldı. Barlyq saualdarǧa jauap berılıp, halyq tarapynan aitylǧan ūsynystarǧa jan-jaqty män berıldı.
– Şaraǧa qarjy polisiiasynan basqa qandai organdar tartyldy?
– Kezdesudı keşendı ärı nätijelı ötkızu maqsatynda köptegen memlekettık organdar men ükımettık emes ūiymdardyŋ ökılderı şaqyryldy. Aşyq esık künı qūqyq qorǧau organdarymen qatar Astana qalasy äkımdıgı, notariattyq palata jäne advokattar alqasy, tūtynuşylar qūqyǧyn qorǧau odaǧy, «Jaŋa qūrylys» JŞS ökılderı qala tūrǧyndarynyŋ barlyq sūraqtaryna jauap berdı.
– Halyqty qandai saualdar jiı mazalaidy eken?
– Qūqyqtyq keŋes aluǧa jalpy sany eluden astam adam keldı. Tūrǧyndardy köbıne jūmyssyzdyq mäselesı mazalaidy. Üleskerlık turaly keŋes sūraǧandarmen qatar, bızdıŋ departamenttegı öndırıstık qylmystar turaly mäseleler qarastyryldy.
– Ädette, aşyq esık künınde azamattar özderı baryp, qūqyqtyq keŋes alady. Al qūqyqtyq keŋes aluǧa mūqtaj mümkındıgı şekteulı jandar eskerıldı me?
– Bızdıŋ departamentte öz erkımen qozǧaluǧa mümkındıgı joq azamattar men soǧys ardagerlerı üşın arnaiy mobildı top qūrylǧan.
Gülmira AIMAǦANBET