Ūmytylǧan ūlttyq taǧamdar ūlyqtaldy
Elordada «Qazaq ūlttyq ashanasynyŋ bıregei taǧamdary» respublikalyq festivalınıŋ qorytyndy kezeŋı öttı. Oǧan öŋırlık ırıkteu kezeŋderınde jeŋımpaz atanǧan aspazdar jinalyp, as daiarlaudaǧy şeberlıkterın körsettı.Osynyŋ aldynda aimaqtyq deŋgeidegı festival Taldyqorǧan, Aqtau jäne Qaraǧandy qalalarynda ūiymdastyryldy. Sol kezeŋderde üzdık şyqqan 12 aspaz elordaǧa şaqyryldy. Bır atap öterlıgı, qatysuşylar osy qalalardan ǧana emes, elımızdıŋ barlyq öŋırlerınen bas qalaǧa jinaldy.– Köpşılık qauym qazaqta quyrdaq, bauyrsaq degen taǧamdar ǧana bar dep oilaidy. Ettıŋ özın «besbarmaq» dep ataimyz. Būl dūrys emes. Adamda bır ǧana barmaq, tört sausaq bolady ǧoi. Ūltymyzda tabaq tartudyŋ özınıŋ män-maǧynasy bar. Kelgen qonaqtyŋ märtebesıne qarai ol syi tabaq, qūda tabaq, küieu tabaq, bala tabaq, taǧy osy siiaqty bırneşe türge bölınedı. Būl festivaldı ūiymdastyryp, ötkızu barysynda ekı jüzdei ūlttyq taǧamdy zerttep, daiarlau ädısterın bıldık. Atap aitqanda, būjy, qaryn kömbe, syrbaz, jaujürek, ülperşek, taǧy osy siiaqty taǧamdar osy künderı taŋsyq asqa ainaldy, – deidı festivaldı ūiymdastyrǧan Ūlttyq muzeidıŋ jetekşı ǧylymi qyzmetkerı, etnograf Äigerım Mūsaǧajynova.Onyŋ aituynşa, festivaldı ötkızuden būryn Qazaq taǧamtanu akademiiasynyŋ atsalysuymen öŋırlerge ǧylymi ekspedisiia ūiymdastyryldy. Būl bır jyldai uaqyt jürdı. Sonyŋ barysynda ūlttyq salt-dästürlerdı, sonyŋ ışınde ata-babalarymyzdan jetken as daiarlau dästürın saqtap qalǧan aq jaulyqty äjelermen kezdesuler öttı. Būl festivaldı «Altyn qazyna» qoǧamdyq bırlestıgı «Qazaqtanu» baǧdarlamasy aiasynda Aqparat jäne qoǧamdyq damu ministrlıgı Etnostyq qatynastardy damytu departamentı qoldauymen ūiymdastyrdy. Sondai-aq būǧan Qazaqstan aspazdary qauymdastyǧy, Restoratorlar kluby qoldau körsettı.