Қалалық Достық үйінде Бірлік күні аясында Қазақстан халқы ассамблеясының дөңгелек үстел отырысы өткізіліп, күн тәртібінде Мемлекет басшысының Жолдауы талқыланды.
Жиынға қоғамдық келісім кеңесі мен Аналар кеңесінің мүшелері, Астана қаласы ҚХА ғылыми-сарапшылық тобының, қалалық этномәдени бірлестіктердің өкілдері мен мемлекеттік мекеме қызметкерлері қатысты. Астана қаласы қоғамдық келісім кеңесінің төрағасы Әміржан Әлпейісов халыққа Жолдауында Президент келер жылды «Жастар жылы» деп жариялауы тарихи әрі стратегиялық маңызы бар шешім екенін атап өтті. «2019 жылы нақты істерге бағытталған жобалар мен жұмыстар қолға алынатын болады. Бұл жарқын істердің көпшілікке тиімді болатыны анық» деді ол. Ал Астана қаласы Қазақстан халқы Ассамблеясы ғылыми-сарапшылық тобының мүшелері Татьяна Кошман мен Орақ Әлиев, Халил Маслов және Аналар кеңесінің төрайымы
Яннат Низамутдинова да Жолдауға қатысты өз пікірлерін білдіріп, ондағы айтылған міндеттерді тиімді жүзеге асыру керектігін, ол үшін қоғамдағы әлеуметтік үйлесімділікті сақтау қажеттігін айтты.
Жиын барысында Астана қаласы Қазақстан халқы Ассамблеясының хатшылығы әрбір қазақстандықтың әл-ауқатын жақсартуға бағытталған Жолдауға бірауыздан қолдау көрсетіп, оны жүзеге асырудағы өздеріне жүктелген жұмыстар мен міндеттерді нақтылады.
«Әрбір қазақстандық Отанды гүлдендіруге бағытталған реформа маңызын жете түсінуі тиіс. Қазір оны табысты жүзеге асыру үшін баршамыздың бірігуіміз аса маңызды болып отыр» деген болатын Мемлекет басшысы халыққа Жолдауында. Бұл тұрғыда қоғамдық келісім мен тұрақтылықты нығайтып, этностар ынтымағын арттырып, халықты бірлікке үндеп, жұртшылықты ортақ іске біріктіру мақсатындағы Қазақстан халқы Ассамблеясының атқарып жатқан қызметінің маңызы зор екенін айтады мамандар.
