СЫПАЙЫ МІНЕЗ – АДАМДЫҚТЫҢ СӘНІ
Мұқамбетқасым ШӘКЕНОВ,
қоғам қайраткері: СЫПАЙЫ МІНЕЗ – АДАМДЫҚТЫҢ СӘНІ
Осы жасыма дейін талай тамаша жандармен танысып, етене араласып, қызметтес болдым. Оңаша отырғанда, кейде сол күндер ойға оралады. Солардың жарқын мінездері, жарасымды әзіл-әңгімелері, асыл азаматтардың бейнелері көз алдымнан кетер емес. Солардың бірі Жамбыл облысында дүниеге келіп, байтақ Қазақстанның түрлі аймақтарында жемісті еңбек еткен, қазір аға буынның өкілі атанған Мұқамбетқасым Қойшыбайұлы Шәкенов дер едім. Мен өзім оның бойынан өзін де, өзгені де қадірлей білетін иманжүзділікті, жөн білетін қазақы тектілікті, сыпайылықты, үлкенге жол берер, кішіні көңіл шыңына шығарар, қатар құрбысын өзімен тең ұстар, ұлық болса да, кішіліктен танбас мырза пейілділікті байқадым. Бұл, сөзсіз, өмір бойы адалдық пен тазалықты негізгі мақсат еткен азаматтың болмысы. Жақында Мұқаңмен кездесіп, сұхбаттасып қайтқан едік.
Арман адамды алға жетелейді
– Соғыс басталған жылдары дүние есігін ашыпсыз. Сол кездегі халқымыз басынан кешкен жұпыны өмір белгілі. Қанды қырғынды көрген ұрпақтың жоқшылық пен таршылықтың азабын тартқаны аян. Әке-шешеңіз, өскен ортаңыз туралы сыр тартсаңыз.
– Иә, біз сұрапыл соғыс жылы өмірге келген ұрпақпыз. Ата-анам құдай деген қарапайым кісілер болды. Шүкірлікпен ғұмыр кешті. Әкемнің аты –Қойшыбай Нақыпұлы. Шешемнің есімі – Мінай Сарыбайқызы. Сауаттары аз болса да, дүниетанымдары кең, қазақы мінезді, балалар тәрбиесіне, олардың оқып, білім алуларына зор көңіл бөлді. Анам дүниеге он төрт перзент әкелгенімен, солардың бесеуі ғана аман қалды. Ол бір ауыр жылдар еді ғой. Әкем бірдеңені сезгендей, әсіресе, екінші баласы Әбілқасымға қалған іні-қарындастарына бас-көз болуды, олардың білім алуларына жағдай жасауын аманат етті. Әбілқасым ағам әкемнің орнына әке болды. Жеңгем екеуі он бала тәрбиелеп өсірді. Маған және қарындастарыма жоғары білім алуға жағдай жасады. Әкелерінен ерте қалған немере інілерім Қалмен мен Оқанды, Әбдіқалықты еңбекке баулып, мамандық әперді, үйлендірді. Өте мейірімді жан еді. Ағайын-жекжаттан қолдан келген жақсылығын аямайтын, жаны жомарт, кеңпейіл азамат болды.
Әбекең ешкімнің ала жібін аттамаушы еді. Меккеге қажылыққа барарда Алматы арқылы ұшты. Жолға керек болады деп жоралғысын жасап едім, алмай қойды. Бір әке-шешеден тусақ та: «Шариғат көтермейді, қажылыққа өз еңбегіммен тапқан қаражатыма баруым керек» деп көнбеді.
– Алғаш рет арманның «пырағына» қашан міндіңіз?
– Шіркін, арман мен қиял деген керемет қой! Ол сені кей уақытта мүмкіндігіңе қарамай асқақтатып жібереді, кейде күтпеген жерден жардан құлата салады. Арман адамды алға жетелейді. Сол арманның жетегімен сегізінші сыныптан кейін облыс орталығы – Жамбылдан бір-ақ шықтым. Шаһардан білім алсам деген ниетіме әке-шешем де қарсы болмады, қайта қолдады. «Жолы болар жігіттің жеңгесі алдынан шығады» дегендей, жолымда жолыққан адамдар кеңпейілді, ізгі ниетті адамдар болып шықты.
1957 жылы Жамбыл қаласына келдім. Мектеп директоры Алдаберген Сәрсембаев ағайдан техникумға түсем деп құжаттарымды әзер алдым. Бейтаныс шаhарды аралап жүріп, Пушкин көшесінің бойындағы орыс мектебіне бас сұқтым. Директоры Павел Кузьмич Цой кілең беске толы құжаттарымды қарап шығып, сол мектепке қабылдады. Жатар орнымның жоқтығын біліп, Жамбыл атындағы қазақ орта мектебінің директоры Сейдуллаев деген ағаймен сөйлесіп, ондағы облыс аудандарынан келген балаларға арналған мектеп-интернатқа орналастырды. Осында оқып, тәрбие алуыма интернат директоры Әкім Садықбеков ағайдың көп шарапаты тиді.
Осылайша, он бес жасымда қалаға келіп, жаңа ортаға бейімделе бастадым, жинақылыққа үйреніп, білімге деген құштарлығым артты. Мектепте түрлі үйірмелерге қатысып, өмірге қажет болар деген мамандықтардың қыр-сырынан жеткілікті мәлімет алдым. Әсіресе, «әуесқой жүргізуші» куәлігінің пайдасын кейіннен мол көрдім.
– Мал шаруашылығына қалай барып жүрсіз?
– Әкемнің сөзі мен үшін жазылмаған заң болды. Не айтса да тік тұрамын. 1959 жылы орта мектепті ойдағыдай бітіргеннен кейін әкемнің кеңесіне құлақ асып, Алматыдағы зоотехникалық-мал дәрігерлік институтына оқуға түстім. Қызыққа толы студенттік өмірді бастан кештім. Шаршап-шалдығуды білмейміз. Жоғары оқу орнының қоғамдық жұмысына белсене атсалыстым, курстың комсоргы болып, түрлі марапаттарға ие болдым. Жалынды жастық шағымда болашақ жарым Шекерге жолығып, көп ұзамай шаңырақ көтердік.
– Қолға диплом ұстаған жас мамансыз. Алғашқы еңбек жолыңыз қалай басталды?
– Шалғайдағы бөлімшенің қатардағы мал дәрігері болып орналастым. Жас маманмын. Тәжірибем аз. Бірақ елдегі өмір көрген адамдардан тағылым алып, олардың ақыл-кеңестерін тыңдап, шаруашылықтың қыр-сырын үйрендім. Көпті көрген қариялар мені адалдық пен тазалыққа баулыды. Қандай жұмыста жүрсем де ұстамды, табанды, сабырлы болуға ұмтылдырды. Соның нәтижесінде әрбір істің тетігін тауып, шешімін әділ, тез шығаруға тырыстым. Елге сыйлы болдым. Абыройым өсті. Жастармен тығыз жұмыс істедім. Соны байқады ма, комсомол ұйымы қызметке шақырды. Жастар арасындағы жұмысты Жамбыл облысы Жамбыл аудандық комсомол комитетінің ұйымдастыру бөлімінің меңгерушісі қызметінен бастадым.
Өзбекәлінің өнегесін көрдім
– Кеңестік кезеңде жастардың мүддесін бір арнаға тоғыстырған комсомол ұйымы дүрілдеп тұрды. Одан талай қайраткерлер шыңдалып шықты. Сіз де сол жолдан өттіңіз.
– Ол кездегі комсомол ұйымы жастардың ақылшысы, қамқоршысы болды ғой. Жастар қоғамдық жұмыстардың бел ортасында жүрді. Жоғарыда айтқан бөлімде істеп жүргенде, мені Жамбыл аудандық комсомол комитетінің екінші хатшысы етіп сайлады. Содан жоғарылап, Қазақстан ЛКЖО Орталық Комитеті комсомол ұйымдары бөлімінің нұсқаушысы, одан соң бөлім меңгерушісінің орынбасары етіп тағайындады. 1970 жылдан бастап Мәскеуге Бүкілодақтық ЛКЖО Орталық Комитеті ауыл жастары бөлімінің нұсқаушысы қызметіне ауыстым. Мұнда үш жыл ғана жұмыс істедім. Былайша айтқанда, комсомол маған үлкен мектеп болды. 1973 жылы Мәскеуде БЛКЖО Орталық Комитетінде жауапты қызмет атқарып жүрген Орталық Комитеттің бірінші хатшысы Е.Тяжельников республика басшылығы жаңадан құрылған Жезқазған облысының жастар одағын басқару үшін мені шақырып жатқанын айтып, шығарып салды.
– Жезқазған жері Сізді қалай қарсы алды?
– Кеңес Одағы кезінде жастардың облыстық ұйымына жетекшілік ету үшін талай сындардан мүдірмей өтіп барып сайланатын. Жастар жетекшілері өздерін қабілет-қарымымен, ұйымдастырушылық және іскерлік қасиетімен, білімділігімен, жұрт алдына шығып сөйлей алатын шешендігімен іріктелетін.
Сол кезде Жезқазған облысында дамыған салалар түсті металлургия мен ауыл шаруашылығы болатын. Осы салаларды одан әрі дамыту үшін ондаған комсомол жастар бригадалары құрылып, жарыстар ұйымдастырылды.
Облыстық жастар ұйымының игілікті бастамасына облыс басшылары үнемі қолдау көрсетіп отырды. Жастарға қажетті өндірістік-әлеуметтік жағдай жасау қатаң бақылауға алынды. Тек бір ғана Ақтоғай ауданында 36 бригада құрылды. Көптеген жастар қой өсіруші жастар бригадаларына баруға тілек білдірді. Екі жыл жұмыс жасаған жастарға Жезқазғанда ашылған институтқа түсуге жеңілдік берілді.
Мәдени салада жағымды өзгерістерге жол ашылды. Облыста кейін аты бүкіл елімізге жайылған «Ұлытау» атты жастар ансамблі құрылды. Жаңадан ашылған Жезқазған облысында парасат, пайымын алға тартуға болатын, өздерінің қажырлы еңбегімен талай-талай биіктерді бағындырған азаматтар аз болмады. Облыс басшылары қарымымды байқап, мені 1977 жылы халық депутаттары Ақтоғай аудандық атқару комитетінің төрағасы етіп тағайындады. Ақтоғай ауданында бір жыл істегеннен кейін Жаңаарқа аудандық партия комитетінің бірінші хатшылығына жоғарылатты.
Бұл киелі өңірде есімдері бүкіл Қазақстанға белгілі тарихи тұлғалар мен мемлекет және мәдениет қайраткерлері дүниеге келген. Аудан халқының әдебиет пен мәдениетке жақын болатыны да сондықтан болса керек. Партия комитетінің хатшысы ретінде ең алдымен ауданның өнері мен мәдениетіне ерекше назар аудардым. Бұрыннан бері ауданның мал мен егін шаруашылықтары жаңа деңгейге көтерілді. Бүкілодақтық социалистік жарыста жеңімпаз атандық, озат малшылар мен дихандар үкіметтік марапаттарға ие болдық. Жалпы алғанда, Жезқазған облысында он бір жыл қызмет істедім.
– Сіздің маңдайыңызға кілең жаңа ашылған облыстарға қызмет істеуді жазған екен. Одан кейін Торғай облыстық атқару комитеті төрағасының орынбасары болыпсыз.
– Торғай даналардың, батырлардың, ақындардың мекені ғой. Мұнда облыстың білім беру, денсаулық сақтау, халықты әлеуметтік қамтамасыз ету, кино, спорт, мұрағат салалары жұмыстарына жетекшілік жасадым. Көрші облыстармен әріптестік байланыс орнаттық. Соның нәтижесінде Ақмола облысында басқармалардың басшыларын жинап, тәжірибе алмасу семинарын өткіздік. Облыс жабылғаннан кейін музыкалық-драма театр труппасын түгелдей Жезқазған облысына көшіруге себепші болып, талантты жас әртістердің өнерден тыс қалмауына атсалыстым.
– Кезінде жалынды жастардың жетекшісі болған көрнекті қоғам қайраткері, ұлт мәдениетінің дамуына өлшеусіз үлес қосқан Өзбекәлі ағамызды аузыңыздан тастамай айтып жүресіз.
– Шынында да, Өзекең сияқты ағалардың орны бөлек. Ол кісімен қоян-қолтық араласып, қызметтес болған қандай ғанибет! Ондай қайраткердің үйретері де, одан үйренерім де мол болды. Өзбекәлі Жәнібеков сабырлы, салмақты, көрегенділіктің үлгісі іспетті өте жайсаң жан еді. Ұлттың өнерін империялық саясат төніп тұрса да, басқадан қызғыш құстай қорыды. Ол жүрген жерде кез келген іс жанданып кетеді. Қазақтың байырғы дәстүрі мен салтын жетік білетін. Өзағаң мен үшін мәдениеттіліктің, ұлағаттылықтың, кісіліктің, тектіліктің эталоны саналды. Әрбір іс-әрекеті салиқалы, сөзі дуалы, мінезі жатық, ешкімді жатырқамайтын, алаламайтын, қараңғыда жол көрсетер бағдаршам іспетті ұлтымызға өте қажет нағыз асыл азамат атанды. Әттең, тұғырлы тұлғаның қадірін аз білдік. Өмір жолымда Өзбекәлі ағадан көп өнеге алдым.
Алып ағаларымды сағынамын
– Бұдан кейінгі қызметіңіз оңтүстік өңірге ауысты. Бұрынғы Қызылқұм, қазіргі Отырар аудандық партия комитетінің бірінші хатшысы болдыңыз. Бөтен жерді жатырқаған жоқсыз ба?
– Қазақтың қай жерінің де маған жаттығы жоқ. Ел мен елді ешқашан алалаған емеспін. Отырар – ұлттың рухани алтын ордасы, қазақ өркениетінің асыл діңгегі. Мысырдағы Александриядан кейінгі әлемдегі ең үлкен кітапхана осында болған. Киелі топырақта туып, ел үшін аянбай тер төккен, жұртына кеңінен танымал қайраткерлердің өзі бір төбе. Солардың біразымен қызметтес, сыйлас болдым. Сол кезде Қызылқұм ауданы республикадағы артта қалған 30 ауданның қатарында екен. Маған Жезқазған мен Торғай облысында жинаған тәжірибем көп көмектесті. Аудандағы әлеуметтік сала да көңіл көншітпейді. Сәбилердің шетінеу пайызы тым жоғары, оның үстіне өкпе ауруына шалдыққандар саны артпаса, кемитін түрі жоқ. Осының бәрін ой елегінен өткізіп, ауданға облыс пен Алматыдан тиісті мамандарды шақыртып, әлеуметтік және медициналық мәселелерді бірлесіп шешу жолдарын іздестіріп, қажетті қаржы бөлінді. Бүкіл саяси ұйымдастыру жұмыстары тұрғындардың әлеуметтік жағдайын жақсартуға бағытталды. Аудан орталығына 530 малшыны үш күнге жинап, дәрігерлік тексеруден өткіздік. Ауданда артта қалған егін және мал шаруашылықтарын озаттар қатарына қосуға әбден болатынына көз жеткізгеннен кейін мамандарды өзім қызмет жасаған Торғай мен Жезқазған облыстарына жіберіп, сонда жүзеге асқан озық технологияларды меңгерудің жолдарымен таныстырдым. Шопандардың тұрмыстық жағдайын жақсартуға күш салдық. Әрине, тек шаруашылықты ғана емес, ауданның рухани өмірі де назардан тыс қалған жоқ. Қасиетті Арыстан баб кесенесінің төңірегін көркейту, көгалдандыру, кесенеге елеулі зиянын тигізе бастаған жерасты суын «жоғалту» мақсатында бірнеше шақырым дренаждар қазу, сондай-ақ, Арыстан баб әулие кешенін адамдар тәуіп ететін жерге айналдыру үшін тұрғынжайлар салдық. Қараусыз қалған Отырар төбе тарихи ескерткішін қоршадық. Дәл сол жылдары аудан атын «Отырарға», бұрынғы «Қызылқұм» газетін «Отырар алқабы» деп өзгерттік. Әбу Насыр әл-Фарабиге ескерткіш қойдық. Бұл да бір көңілімді марқайтып жүретін игілікті іс болды деп ойлаймын.
– Халқымыз «Қызмет – қолдың кірі» деп айтады. Сіз жас күніңізден атқа мініп, түрлі басшылық қызмет атқардыңыз. Осы түсінікті қалай қабылдайсыз?
– Халық айтса, қалп айтпайды ғой. Мәселе – қызметті қалай атқаруда. Ел деп, жер деп жан салып жұмыс істесеңіз, жұрт сізді бағалайды. Аспанға көтереді. Ондай қызмет «қолдың кірі» болмайды. Менің ойымша, ел мүддесі бәрінен биік тұру керек. Өткен ғасырдың тоқсаныншы жылдардың басында республика басшылығы мені Қазақтың тарих және мәдениет ескерткіштерін қорғау қоғамы орталық кеңесі президиумының төрағасы етіп сайлады. Бұл Кеңес Одағының қабырғасы сөгіліп, берекесі кетіп бара жатқан өліара кезеңі болатын. Сол жылдарға дейін еліміздің көптеген құнды ескерткіштері еленбей, тарихи жәдігерлеріміздің көбі кім көрінгеннің қолында кеткен еді. Енді соларды түгендеп, халық кәдесіне жаратуды қолға алдым. Бірталай жұмыстар атқарылды. Одан кейін ҚР Үкіметі аппаратының аймақтық даму бөлімі меңгерушісінің орынбасары, содан соң бас инспекторы қызметін атқардым. Зейнеткерлікке шыққаннан кейін де «KEGOC» компаниясында еңбек еттім. Білгенімді, өмірден түйгенімді кейінгі жастарға үйреттім. Қарап отырсам, ғұмырымның саналы жылдары мемлекеттік қызметке арналыпты. «Сыпайы мінез – адамдықтың сәні» дейді ғой біздің қазақ. Осы мінезімнің арқасында халқымыздың талай тау тұлғаларымен дос болдым, аралас-құралас жүрдік. Әсіресе, Өзбекәлі Жәнібеков, Нұртаза Ибраев, Әбіш Кекілбаев, Қуаныш Сұлтанов, Серік Үмбетов, Сиязбек Мұқашев, Илья Жақанов, Қойшығара Салғарин, Ақселеу Сейдімбек, Кәрібай Ахметбеков, Алмасадам Сейтқалиев, Тасболат Байқалиев, Қуаныш Алпысбеков секілді талай сыйлас азаматтарды кездестірдім. Қазақтың біртуар ұлы, ірі қайраткер Кәкімбек Салықов ағамызбен туған бауырындай араластым. Қазір өмірден өтіп кеткен алып ағаларымды сағынамын. Сол жолмен мен де жүріп келемін.
– Мұқа, шынайы әңгімеңізге көп рақмет!
Сұхбаттасқан
Мейрам БАЙҒАЗИН,
журналист