Қазақстан Президенті Н.Назарбаевтың «Болашаққа бағдар: рухани жаңғыру» бағдарламасы аясында Еуразия гуманитарлық институтының «Аққу» әдеби бірлестігінің ұйымдастыруымен «Туған жерге тағзым» атты әдеби кеш болып өтті.
Кеш барысында өнерлі студенттер белгілі ақындардың туған жер, ауыл, қала тақырыбындағы поэзиялық туындыларын нақышына келтіре оқып, лирикалық әндер шырқады. Бірлестіктің жас ақындары туған жерге арналған өз өлеңдерін ұсынды.
«Патриотизм кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады» деген Елбасы сөзі негізінде театрландырылған қойылымды шебер көрсетті. Отанымыздың әрбір өңірінің ерекшеліктерінен сыр шертетін слайд-шоу да көрермендер назарына ұсынылды.
Кеш соңында институт деканы, доцент Қ.Мамаділ: «Кештің әсерінен әрқайсымыз бір сәтке туған жерімізге ойша саяхат жасап қайттық. Осындай кештер санамызға рухани серпіліс беріп, қанаттандыратыны рас. Сондықтан да рухани әлемімізді байытып, отансүйгіштікке жетелейтін кештерді жиі өткізіп тұру қажет» дей келе, шараны ұйымдастырған доцент Лаура Дәуренбековаға алғысын білдірді. Әдеби кешке жиналған қауым қара өлең мен жанды дауыста шырқалған әсем әндерден ерекше әсер алып, жігерленіп қайтты.
Мерболат ЕРМЕКОВ,
Еуразия гуманитарлық институтының 4-курс студенті
