ЮНЕСКО-ның әлемдік мұралар тізімінде Қазақстанның үш нысаны бар. Олар – Қожа Ахмет Ясауи кесенесі, Тамғалы петроглифтік тас кешені және Сарыарқа – Солтүстік Қазақстан өңіріндегі көлдер. Оған қоса, қазір Жапонияның қолдауымен ежелгі Отырар қаласының орнын осы тізімге енгізу қарастырылуда.
Бүгінде ЮНЕСКО-ның «Әлем зердесі» деректі мұрасының Дүниежүзілік тізіміне қазақстандық құнды деректерді кіргізу жұмыстары қолға алынды. Еліміздің Мәдениет министрі Арыстанбек Мұхамедиұлының айтуынша, айтыс, қазақ үйiн жасау ерекшелiктерi, саятшылық сынды көптеген дәстүрді ЮНЕСКО тiзiмiне енгізу көзделуде. Сонымен қатар, Семей-Невада антиядролық қозғалысы мен Арал теңізінің проблемалары да тыс қалмайды. «Бiздiң мақсатымыз – келер аптада өтетін кеңес аясында Қазақстанның көптеген құндылықтары мен ерекше дәстүрлерiн ЮНЕСКО тiзiмiне енгiзу» дейдi министр.
