Жаңа мектептер бой көтереді
Елордада бірнеше жаңа мектеп салынуда. Келер жылы Байқоңыр ауданында – 2, Алматы ауданында 3 мектеп пайдалануға берілмек.
Байқоңыр ауданындағы Сейфуллин–Омаров және Иманов–Брусиловский көшелерінің қиылыстарында салынып жатқан 900 орындық екі жаңа мектептің құрылысы алдағы оқу жылының қарсаңында аяқталмақ. Сонымен қатар, келер жылы осы аудандағы тағы 6 балабақшада жөндеу жұмыстары жүргізіледі деп жоспарлануда. Онымен қоса, 18 білім беру нысанының жанында жол таңбалары мен бағдаршамдар орнатылмақ.
Ал Алматы ауданында алдағы жылы үш мектеп пайдалануға беріледі деп күтілуде. 1200 орынға шақталған білім ошақтары Майқайың мен А351 көшелерінің және Панфилов көшесі мен Тәуелсіздік даңғылының, Қалдаяқов пен Әзірбаев көшелерінің қиылысында орналасатын болады. Сондай-ақ Б.Момышұлы даңғылында 900 орынға арналған тағы бір мектеп бой көтермек. Ал «Мичурин» тұрғын алабында 600 орындық орта мектептің құрылысы жүргізілуде. Бұдан бөлек, бірқатар мектептерге жапсарлас ғимараттар да салынбақ.