Астана қаласындағы «Қазтұтынуодағының» Сауда-экономикалық колледжінде Мемлекеттік рәміздер күніне арналған әскери-патриоттық шара өткізілді. Оның жеңімпаздары екі қабатты туристік автобуспен Астана қаласының көрнекті орындарын аралауға мүмкіндік алды.
Бұл шара байқау түрінде өткізілді. Қатысушылар «Үздік командир», «Үздік автомат құрастырушы», «Үздік әскери киім», «Үздік әскери жаттықтырушы» номинациялары бойынша сайысқа түсті. Болашақ жауынгерлер Отан қорғауға қауқарлы екенін аңғартты. Сондай-ақ, алғашқы әскери дайындыққа сайма-сай екенін көрсетті.
«Әскери-патриоттық шара өткізуіміздің бір себебі – еліміздің ертеңін сеніп тапсыра алатын денсаулығы мықты, алғашқы әскери дайындықтарынан өткен азаматтарды тәрбиелеп шығару. Болашақ сарбаз босбелбеу болмас үшін ата-аналармен қатар, сол азамат оқитын оқу орны да бұл мәселені естен шығармау керек. Өйткені, Отанды қорғау – абыройлы міндет» дейді колледж директоры Мырзабек Күжімов.
Қымбат НҰРҒАЛИ
