ەلورداداعى جاستار سارايىندا اكىمدىكتىڭ حالىقتى جۇمىسپەن قامتۋ ورتالىعى جارمەڭكە ۇيىمداستىرىپ, 1000-عا جۋىق بوس جۇمىس ورنىن ۇسىندى. ودان بولەك, «اشىق مەملەكەت» مەملەكەتتىك قىزمەتتەردىڭ جارمەڭكەسى وتكىزىلدى. وندا كەلۋشىلەرگە ەلەكتروندى تسيفرلى قولتاڭبا بەرىلىپ, وزگە دە قۇجاتتار مەن انىقتامالاردى الۋدىڭ جولدارى ءتۇسىندىرىلدى.
بيىل جىل باسىنان بەرى جۇمىسپەن قامتۋ ورتالىعىنا 7 مىڭنان استام ادام ءوتىنىش قالدىرعان ەكەن. ورتالىقتىڭ مالىمەتىنە سۇيەنسەك, ونىڭ 2652-ءسى جۇمىسقا ورنالاستىرىلدى. ال ءبۇگىنگى جارمەڭكەدە 100 شاقتى جۇمىس بەرۋشىلەر ۇمىتكەرلەرمەن تىكەلەي تىلدەسىپ, سۇحباتتاستى. جۇمىسپەن قامتۋ ورتالىقتارىنىڭ ماماندارى ەڭبەكپەن قامتۋ, جۇمىسقا ورنالاسۋ, قايتا دايارلاۋ, جۇمىس ىزدەۋ تەحنولوگياسى, كاسىپتىك وقىتۋ جانە قوسىمشا كاسىبي ءبىلىم بەرۋ مۇمكىندىكتەرى تۋرالى كەڭەس بەردى.
جۇمىسپەن قامتۋ ورتالىعىنىڭ جۇمىس بەرۋشىلەردى قولداۋ ءبولىمىنىڭ باسشىسى قالامقاس كۋلشيمانوۆا بيىل ەلوردادا تاعى 4 جارمەڭكە ۇيىمداستىرۋ كوزدەلگەن دەيدى. ونىڭ ايتۋىنشا, اتالمىش شاراعا جۇمىس بەرۋشىلەردىڭ وزدەرى دە زور ىقىلاس تانىتىپ وتىر. سەبەبى جارمەڭكە – مەكەمەلەر ءۇشىن مامانداردى سۇرىپتاپ, تاڭداپ الۋعا تاپتىرماس مۇمكىندىك.
ال «اشىق مەملەكەت» جارمەڭكەسىندە مەملەكەتتىك ورگاندار تۇرعىندارعا ونلاين قىزمەتتەردى قالاي الۋعا بولاتىنىن ءتۇسىندىردى. ماسەلەن, ءادىلەت دەپارتامەنتى قۇجاتتارعا اپوستيل قويۋ ءتارتىبىمەن تانىستىردى. قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى باسشىسىنىڭ ورىنباسارى رومان كيم بۇل شارا ەلباسى جاريالاعان «تسيفرلى قازاقستان» باعدارلاماسىن جۇزەگە اسىرۋعا باعىتتالعانىن جەتكىزدى.
